Салгыы СӨ Бырабыыталастыбатын дьиэтин өрөспүүбүлүкэ саалатыгар судаарыстыба уонна биэдэмистибэлэр наҕараадаларын үөрүүлээхтик туттарыы ыытылынна. Эбиэт кэннэ Бэчээт дьиэтин пресс-киинигэр СӨ Суруналыыстар сойууһун уонна сонуну киэҥник тарҕатар сириэстибэлэр наҕараадаларын туттардылар, күрэхтэр, куонкурустар түмүктэринэн кыайыылахтары чиэстээһин, бэлиэтээһин бэрт сэргэхтик бара тураллар. Ол курдук бүгүн биһиги кэллиэгэбитигэр, “ Ил Түмэн” хаһыат ырытааччытыгар, талааннаах суруналыыска Раиса Сибиряковаҕа Саха Өрөспүүбүлүкэтин үтүөлээх суруналыыһа үрдүк аата иҥэрилиннэ. Раиса Спиридоновна киэҥ эйгэҕэ хаһыатчытынан эрэ буолбакка, суруйааччы уонна тылбаасчыт быһыытынан эмиэ биллэр. Бииргэ үлэлиир, ытыктыыр кэлиэгэбитин истиҥник эҕэрдэлээн тураммыт, кылгастык бэйэтин санаатын үллэстэригэр көрдөстүбүт.
-Эҕэрдэҕит иһин махтал! Түгэнинэн туһанан бары кэллиэгэлэрбин, хаһыатчыттары Саха нассынаалынай бэчээтин күнүнэн эҕэрдэлиибин уонна бу үрдүк наҕарааданы тутан тураммын, үйэ чиэппэриттэн ордук үлэлээн кэлбит идэбинэн киэн туттабын, дьону-сэргэни кытта бииргэ сылдьан, сайдыыны кытта тэҥҥэ хардыылаһан иһэрбиттэн, дойдубар туһаны аҕаларбыттан үөрэбин диэхпин баҕарабын.
СГУ историко-филогогическай факультетын саха тылын уонна литературатын салаатыгар үөрэммитим. Үөрэхпин бүтэрэн, оскуолаҕа учууталлаабытым, үөрэх Чурапчытааҕы управлениетыгар методистаабытым, кыраайы үөрэтэр мусуойга эксурсоводунан, онтон дириэктэринэн үлэлээбитим. Ол тухары улуустааҕы «Саҥа олох» хаһыакка уопсастыбаннай кэрэспэдьиэн этим. Онтон каадыры бөҕөргөтүү бэрээдэгинэн, «Саҥа олох» хаһыакка 1998 сылтан үлэлээбитим. Сурук салаатын салайан, уопсастыбаннай кэрэспэндьиэннэри кытары дьарыктаммытым, сылга биирдэ мунньах тэрийэн, ханнык тиэмэлэргэ уонна хайдах суруйар туһунан сүбэлиирбит, билиҥҥи тылынан эттэхэ, маастар-кылаас ыытарбыт. 2001 с. Галина Говорованы кытары бырагыраама оҥорон, уопсастыбаннай кэрэспэдьиэннэр икки сыллаах кэтэхтэн оскуолаларын үлэлэппиппит. Онно балачча элбэх киһи, оҕо дьарыктанан, Суруналыыстар сойуустарын чилиэннэрэ буола үүммүттэрэ. Сорохторун кытары билигин да билсэбин, матырыйаалларын таһаарабын. Дьиэтээҕи балаһыанньабынан куоракка көһөн киирэн, 2005-2021 сс. «Саха сирэ» хаһыат тыа сирин сырдатар салаатыгар үлэлээбитим, 2021 сыл алтынньы 4 күнүттэн «Ил Түмэн» хаһыакка үлэлиибин. Онон хаһыакка лоп курдук 26 сыл үлэлээтим, сэмэй үлэбин үрдүктүк сыаналаабыттарын иһин салайааччыларбар «Ил Түмэн» издательскай дьиэ генеральнай дириэктэригэр Мария Христофороваҕа, шеф-редактор Галина Бочкареваҕа дириҥник махтанабын. Ситиһиилээх үлэни баҕарабын.
-
4
-
0
-
0
-
0
-
0
-
0
