2019 сыллаахтан, харчы төлөөччүлэри көмүскүүр инниттэн, элбэх мэндиэмэннээх дьиэлэри тутууга эскроу-счеттары туһанар булгуччулаах буолбута. Ааспыт сыл кулун тутарыттан бу мэхэньииһим коттеджнай бөһүөлэктэргэ туттуллубута. Билигин чааһынай дьиэни тутууга киллэриэхтэрин баҕараллар. Тутааччылар, банк бигэргэппит типовой бырайыагынан дьиэни тутар кэмнэригэр, харчыларын эскроу-счеттарга ууруохтара. Өскөтүн банк банкроттаатаҕына дольщиктарга 10 мөлүйүөн солкуобайга диэри төлүөхтэрэ. Маннык сокуон барылын Госдуума от ыйын 3 күнүгэр пленарнай мунньахха иккис ааҕыыга ылынна.
Эскроу-счеттар туох барыстаахтарый?
2023 сыллаахха Арассыыйа олохтоохторо рекорднай ахсааннаах, о.э. 59 мөлүйүөн квадратнай миэтэрэ иэннээх, чааһынай дьиэни туттубуттар. Дьиэни долевой тутуу дуогабарынан тутуохха сөп. Маныаха туттарар киһи тутааччыны кытта дуогабар түһэрсэр уонна харчытын төлүүр. Маннык систиэмэ бэлэм дьиэни атыылаһыыга тэҥнээтэххэ атыылаһааччы үбүн кэмчилииргэ ордук табыгастаах, тоҕо диэтэр, тутааччылар атыылаһааччылары тардарга анаан тутуллубут дьиэлэр сыаналарын чэпчэтэллэр. Ол гынан баран, тутааччы банкроттаатаҕына эбэтэр харчы ылан баран сүтэр түгэнигэр атыылаһааччы укпут үбүттэн мэлийэр кутталлаах.
Дольщиктары көмүскүүр, үптэрин харыстыыр туһуттан эскроу-счеттары толкуйдаабыттар, оттон тутааччыларга дьиэни тутан бүтэрбиттэрин эрэ кэннэ харчыны биэрэллэр. Өскөтүн дьиэни туппатахтарына, эскроу-счекка сытар харчыны атыылаһааччыга төннөрөллөр. Оттон тутууну ситиһиилээхтик бүтэрэр түгэнигэр сууманы тутааччы ылар. Эскроу-счеттар страховкаланаллар, ол иһин банк банкроттуур түгэнигэр счекка сытар үп атыылаһааччыга төннөрүллэр.
Тутуу хампаанньалара эбэтэр урбаанньыттар чааһынай дьиэни дьон бас билэр сирдэригэр туталларын туһунан этиллэр. Бастакы ааҕыыга ылыллыбыт мэхэньииһим бас билиигэ баар сиргэ-уокка эрэ тарҕанара. Судаарыстыбаннай Дуума Тутууга уонна олох-дьаһах хомунаалынай хаһаайыстыбатыгар кэмитиэтин бэрэссэдээтэлин солбуйааччы Сергей Колунов эппитинэн, сокуон барылын (№ 471420-8) иккис ааҕыыга саҥа нуормалары арендаҕа эбэтэр босхо туһаныллар учаастактарга сыһыаннаах көннөрүүнү киллэрдилэр.
Дьон тутуу бэдэрээтин дуогабарын тутааччыны кытта түһэрсэллэр, ол эрээри, харчы тутааччыга быһаччы буолбакка, боломуочуйалаах банк эскроу- счетугар түһэриллиэҕэ. Маннык дуогабар халыыбын Арассыыйа Минстройа бигэргэтиэҕэ.
Иккис ааҕыыга көннөрүүлэргэ эскроу-счет харчытын сакаасчыт ылыытын бэрээдэгэ чуолкайданна. Тутуу бүппүтүн кэннэ тутааччы олорор дьиэни бас билии быраабын судаарыстыбаннай регистрациялааһын туһунан иһитиннэриини бааҥҥа биэриэхтээх. Бу кэнниттэн биэс хонук устата баан бэдэрээччит харчытын төлүүргэ эбэтэр кирэдьиитин эбээһинэһин төлүүрүгэр сууманы биэриэхтээх, өскөтүн ол дьиэни тутууга тутааччы кирэдьиит ылбыт буоллаҕына.
Бу туһунан сиһилии https://www.pnp.ru/economics/dlya-stroitelstva-chastnogo-doma-budut-ispolzovat-eskrou-scheta.html сигэнэн киирэн аах.
Хаартыска куйаар ситимиттэн
-
0
-
0
-
0
-
0
-
0
-
0
