Бу ойуур баһаардара айылҕа содулун түмүгэр, ол эбэтэр ардаҕа суох куйаас кэмҥэ этиҥтэн умайан, бастаан 32 – 37 килэмиэтир ыраах киһи да, тиэхиньикэ да тиийбэт сиригэр бааллар этэ. Бу күннэргэ соҕурууттан кураанах улахан тыал түһэн, баһаары бэттэх аҕалан ыксата сырытта. Бүгүҥҥү күҥҥэ баһаардар хонтуруолга ылыллан, Токума учаастагар кэлбит уоту умуруорууга 30 киһи уонна 3 анал тиэхиньикэ кыттар.
Маны таһынан, Ыксаллаах быһыы-майгы министиэристибэтин Саха Сиринээҕи кылаабынай Управлениетын 10 баһаарынайа, өрөспүүбүлүкэтээҕи “Авиалесоохрана” тэрилтэтин 7 үлэһитэ көмөҕө кэлбит уонна улуус кииниттэн, Баатаҕайтан тиийбит эбии 10 киһи уоту умуруорууга көхтөөхтүк кытталлар. Ол курдук, опашка оҥоруутугар МТЗ - 82 булууктаах тыраахтар, итиэннэ «Аартыка суоллара” тэрилтэ 2 улахан кыамталаах бульдозера үлэлиир.
Сайдыы сиригэр кэлбит уоту умуруорууга 10 олохтоох киһи, 26 «Авиалесоохрана» тэрилтэ уонна Баатаҕай тэрилтэлэрин 10 үлэһитэ кыттар. Онтон минерализованнай балаһаны эбии кэҥэтии үлэтигэр Агромаш бульдозера үлэлиир. Дьааҥы улууһун баһылыга Владислав Михайлович Иванов иһитиннэрбитинэн, оттугунан уонна аһынан хааччыллыы тиһигин быспакка ыытыллар. Санатан эттэххэ, Ил Дархан Айсен Николаев дьаһалынан улууска иккис күнүн Саха Өрөспүүбүлүкэтин экологиҕа, айылҕа харыстабылыгар миниистири бастакы солбуйааччы Дьулустан Иванович Хон үлэлиир.
-
7
-
0
-
0
-
0
-
0
-
0
