“ДЭК Якутскэнергосбыт”, «Туймаада саллаата» искибиэр, “Сургутнефтегаз” Саха Сиринээҕи салаата, мин санаабар, бастыҥнар ахсааннарыгар киирэллэр.
“ДЭК Якутскэнергосбыт” киһи эрэ хараҕын араарбакка кэрэхсии көрөр хатыҥ чараҥ быыһыгар турар тупсаҕай тэлгэһэтигэр баар үгүс-үтүмэн сибэкки ханна эрэ куруорка, соҕуруу дойду санаторийын саадыгар сылдьар курдук өйдөбүлү үөскэтэр. Хатыҥнар быыстарыгар ыскамыайкаҕа олорон, араас өҥнөөх сибэккилэри көрөн, санааҥ сэргэхсийэр, сүргэҥ кытта көтөҕүллэр.
Көмүс илиилээх оҕуруотчут үлэтин таптыыра итинтэн көстөр. Сибэкки өҥүн табан, кэлбит киһини кустуктана оонньуур дьол туругар сатаан киллэрэр курдук оҥорбута, силигин ситэрбитэ дууһаҕын үөрдэр. Бу курдук хас биирдии тэрилтэ тэлгэһэтигэр үүнээйини олордоро буоллар, куораппыт сыл ахсын тупсан, киэркэйэн иһиэ этэ.
Иккиһинэн, Губинскай уокурук управата «Туймаада саллаата» искибиэргэ сыл ахсын сүүһүнэн, тыһыынчанан араас өҥнөөх сибэккини олордон, дьон хараҕын үөрдэр. Бу искибиэр өйдөбүнньүк пааматынньыгар Аҕа дойдуну көмүскүүр сэриигэ сырдык тыыннарын толук уурбут, эйэлээх олоҕу уһансыбыт 20 600 буойун аата үйэтитиллибитэ.
Кустук сэттэ өҥүнэн кустуктана оонньуур муора курдук үгүс-үтүмэн сибэкки Кыайыыны уһансыбыт саллааттар хорсун быһыыларын кэнэҕэс көлүөнэ умнубатын, кинилэргэ сүгүрүйэрин, махтанарын бэлиэтиир.
Үсүһүнэн, Дьокуускай куорат килбэйэр киинигэр баар “Сургутнефтегаз” Саха Сиринээҕи салаатын хонтуоратын аттынан хааман иһэн үгүс дьон тохтуу түһэн, чээлэй күөх кырыска сэлэлии үүммүт сибэккилэри хаартыскаҕа түһэрэр. Барыта уурбут-туппут курдук тупсаҕайын, бэрээдэктээҕин, тиэргэни тупсарар анал идэлээх үлэһит бэркэ оҥорбутун хайгыы көрөҕүн.
Оттон эһиги хойуу мастаах, өлгөм сибэккилээх ханнык тиэргэннэри билэҕитий?
Ааптар хаартыскаҕа түһэриилэрэ.
-
1
-
1
-
0
-
0
-
0
-
0
