Балаҕан ыйын 7 күнүгэр Орджоникидзе болуоссатыгар Дьокуускай куорат 392 сылынан уруйдаан, ИДьМ, ГИБДД үлэһиттэрин быыстапката, кинигэ дьаарбаҥката, кэнсиэр буолан ааста.
Күн бүгүн бэрэдээги араҥаччылыыр салааҕа үлэһиттэр тиийбэттэр. Манна 35 диэри саастаах, эт-хаан өттүнэн эрчиллиилээх, юридическай үөрэхтээх эдэр дьону ылаллар.
«ДПС инспектордара улахан тыастаах массыыналары, террористар эстэр сэби укта сылдьалларын сэрэтэргэ тимир көлө аннын бэрэбиэркэлиибит, протокол толоробут, алкотестерынан итирдэр утаҕы испит дьону чинчийэбит, өскөтүн 0,16 үөһэ таҕыстаҕына, ол аата суоппар кыраадыстаах утаҕы испитэ биллэр.
Ону таһынан, массыына тонировкатын көрөбүт, ити бүрүөһүн күн сырдыгын 70% киллэриэхтээх, онтон намыһах түгэнигэр тонировкатын устуохтаах», — диэн кэпсиир Анатолий Егоров, ОСБ ДПС ГАИ тус састаабын кытта үлэлиир инструктора.
Полиция үлэһиттэрэ эксперт-криминалист, ППС туох-ханнык тэрили тутта сылдьан үлэлиирин көрдөрө-көрдөрө кэпсииллэр. Холобур, анал тэрилинэн хас хонуктаах хаан тохтубутун, ыстакааҥҥа хаалбыт тарбах суолун чинчийэллэр.
Куорат күнүгэр былыргы кинигэлэри-сурунааллары аҕалан, дьоҥҥо босхо түҥэттилэр, остуол оонньуутун, күһүҥҥү тууһаммыт, ыыһаммыт балыгы атыыга таһаардылар. «Сэргэчээн», «Иэйии», «Рябинушка» үҥкүү ансаамбыллара, «Забавушка» домристар бөлөхтөрө уонна да атын норуот уус-уран айымньытын күүһүнэн кэнсиэр ньиргийдэ эрээри, халлаан тымныы буолан, киһи олох аҕыйах, ыскамыайкалар кураанах оҥойон тураллар.
Онон Дьокуускай куорат күнүн сайын атырдьах ыйыгар күннээх сылаас кэмҥэ көһөрөр ордук буолуо эбит. Санатан эттэххэ, бу өрөбүллэргэ Москва куорат күнүн бэлиэтииллэр. Анараа халлаан сайыҥҥылыы турар, оттон Сахабыт Сиригэр балаҕан ыйыгар тоҥо сылдьан бырааһынньыгы көрө сатыыр астыга суох курдук, саатар киһи хараҕын үөрдэр сонун тэрээһин, сибэкки быыстапката туох даҕаны суох.
Ааптар хаартыскаҕа түһэриилэрэ.
-
0
-
0
-
0
-
1
-
0
-
1
