Пуорумҥа Саха Сирин бары улуустарыттан эдэр исписэлиистэр кыттыахтарын сөп. Кинилэргэ анаан үөрэтэр бырагыраамалар ыытыллыахтара, онно үөрэтэр-сырдатар бырайыактары хайдах оҥорорго үөрэтиэхтэрэ, такайыахтара, сатабылын көрдөрүөхтэрэ. Холобура, бастыҥ бырайыактары сайыннаран, салгыы үлэлиир бырагыраамаҕа таһаарыахха сөп.
Алексей Еремеев бэлиэтииринэн, Николаевскай пуорум олоххо көхтөөх ыччаты мунньуоҕа уонна өссө төгүл өрөспүүбүлүкэ сайдыытыгар быһаччы көмөлөөх, дьайар кыахтаах бырайыактары көрдөрүөхтэрэ, оҥоруохтара. Кини итинник бырайыактар ааптардарын кытта быһаччы тус үлэни ыытыахпыт, онон пуорум эдэр дьоҥҥо бэртээхэй старт биэриэҕэ диэтэ.
Пуоруму тэрийэргэ, ыытарга анал кэмитиэт тэрилиннэ, онно салайааччынан Ил Түмэн Судаарыстыбаннай тутулга уонна сокуону оҥорууга сис кэмитиэтин бэрэссэдээтэлэ Афанасий Владимиров ананна. Кэмитиэккэ ону таһынан СӨ Бырабыыталыстыбатын чилиэннэрэ, Ил Түмэн иһинэн Ыччат парламенын чилиэннэрэ уонна Арассыыйа Дьоруойа Игорь Юргин киирдилэр.
Маҥнайгы Николаевскай пуорум 2023 сыллаахха Саха Сирин бастакы Бэрэсидьиэнэ Михаил Николаев сырдык кэриэһигэр анаммыта, онно 70 кыттааччы, 30 эспиэрт үлэлээннэр, өрөспүүбүлүкэ 2032 сылга, салгыы 2050 сыллаахха диэри социальнай-экэнэмиичэскэй сайдыытын Стратегиятыгар этиилэрин киллэрбиттэрэ.
Хаартыска куйаар ситимиттэн ылылынна
-
0
-
0
-
0
-
0
-
0
-
0
