– Баччаларга, хомуур үлэтэ үмүрүйүүтэ, сылын ахсын быыстапка-дьаарбаҥка ыытыллар. Онно өрөспүүбүлүкэ табаары оҥорооччулара – бааһынай хаһаайыстыбалар, кэпэрэтииптэр, бөдөҥ астыыр-таҥастыыр хампааньалар уонна агрооскуолалар көхтөөхтүк кытталлар. Киин куорат олохтоохторо, ыалдьыттара кэлэн көрдүннэр, кыстыыр астарын-үөллэрин хааччынныннар диэн быыстапка-дьаарбаҥка биэс күн устата, сарсыарда 10 чаастан киэһэ 19 чааска диэри буолуоҕа. Хас күн ахсын анал бырагырааманан араас култуурунай тэрээһиннэр, маастар-кылаастар, ураты бүлүүдэлэр дегустациялара, асчыттар сүбэ мунньахтара, төгүрүк остуоллар ыытыллыахтара. «Сахаагропродукт» кэпэрэтииби уонча сыл салайан үлэлэппит Константин Егорович Тимофеев туһунан кинигэ сүрэхтэниэҕэ. Түмүккэ АГАТУ ипподромугар ат сүүрдүүтэ буолуоҕа. Киин куорат олохтоохторун уонна ыалдьыттарын быыстапка-дьаарбаҥкаҕа кэлэҥҥит кыстыыр аскытын хааччынаргытыгар, быыстапка-дьаарбаҥка тэрээһиннэригэр көхтөөхтүк кыттаргытыгар ыҥырабыт, – диир тыа хаһаайыстыбатын уонна ас-үөл бэлиитикэтин миниистирин солбуйааччы Николай Афанасьев.
-
2
-
0
-
0
-
0
-
0
-
0
