Уопсастыба

Эрэдээктэрбэр махтанабын

Ньургуйаана Стручкова, «Сахабэчээт» тэрилтэ генеральнай дириэктэрэ:

— Лоп курдук,  биһиги үөрэхпитин СГУ суруналыыстыкаҕа салаатын бүтэрэр сылбытыгар «Ил Түмэн» хаһыат тэриллибитэ. Парламент үлэтин сырдатарга, норуот хаһыатын оҥорорго сүрүн эрэдээктэр Константин Федоров сытыы бөрүөлээх, сахабыт тылын уус тылын дэгиттэр баһылаабыт эр дьонтон турар күүстээх хамаанданы хомуйбут этэ.

Дьокутааттар норуот талбыт дьоно буолан, кини интэриэһин көмүскүүргэ үлэлииллэр, онтон хаһыат дьон кыһалҕатын ырытыһар, көмөлөһөр аналлаах диэн тэриллибитэ. Эрэдээксийэ Ил Түмэн иһигэр биир хоско олороро, ол иһигэр Альберт Степанов – Куорат уола, Битээлий Сур, кэргэнэ Валерия, Михаил Слепцов, Прокопий Иванов, Бүөтүр Томскай – Мохсунуоха, Уйбаан Гаврильев о.д.а бэлиитикэҕэ дириҥ хорутуулаах ырытыылары, сытыы кыһалҕалары туруоран, сэргэх ыстатыйалары бэчээттээн, хаһыат ис хоһоонун байыталлара. Фотографпыт Николай Барашков түргэн-тарҕан туттунуулааҕа, хатыламмат ураты каадыры оҥороро.

Сүрүн эрэдээктэри солбуйааччы Туйаара Федорова, эппиэттиир сэкиритээр Лидия Сибирякова, верстальщик Ваня Гоголев хаһыаты таһаараллара. Лидия Сибирякова киһи быһыытынан ийэлии истиҥ сыһыаннааҕа, хаһыаппыт халыҥ буолан, киэһэ хойукка диэри олорон туттарар этибит. Кэрэспэдьиэн аайы иккилии-үстүү балаһа тиксэрэ. Үлэбитигэр дьээбэлэһэн, бары үөрэ-көтө үлэлээн, истиҥник саныыбын.

Константин Анатольевич айар үлэ абылаҥар ылларбыт, идэтийбит, таһымнаах кэлэктиипкэ, биһигини, эдэр дьону ылан, үлэбин мантан саҕалаабыппар, аксакал суруналыыстартан элбэххэ үөрэммиппэр киниэхэ махтанабын. 

Оччолорго үөрэхпитин саҥа бүтэрбит Виктория Контоева, Лена Володкина, Лена Обутова, Дьулустаан Старостин уопуттаах суруналыыстар эйгэлэригэр киирэн, онно сыһыарыллан, хатарыллан, эрэдээксийэ үлэтэ маннык буолуохтаах диэн өйдөбүлү ылбыппыт. Итинник таһымнаах айар кэлэктиипкэ түбэһэн, үлэҕин саҕалыыр дьол эбит. Эрэдээксийэнэн айылҕаҕа тахсарбыт, ыһыахтыыр этибит, онтон туспа дьиэлэнэн, ТРК «Туймаадаҕа» көспүппүт, бастакы этээскэ типография баара, биһиги кырыыһа анныгар саамай үөһэ лиибэ, түннүгэ-үөлэһэ  суох хоско олорбуппут.

СӨ бастакы үтүөлээх суруналыыһа, биллиилээх публицист, «Кыым»  хаһыат сүрүн эрэдээктэрэ Уйбаан Гаврильев улуустар майгыларын туһунан рубрикалаах этэ, онно киэҥ ырытыһыы тахсара.

Күннэтэ эрэдээксийэ аана сабыллыбат этэ, уопсастыбаннай кэрэспэдьиэннэр халыҥ аармыйалара кэлэн кэпсэтэн, матырыйаал аҕалан бараллара. Николай Чуор кэллэҕинэ ыллаан дьиэрэтэн, хоспут иһэ тута сэргэхсийэ түһэрэ.

Мин нууччалыы хаһыакка үлэлээбитим, кэриэктэрбит Галина Скрыбыкина тылбын-өспүн үгүстүк көннөрөн, сороҕор мөҕөн, санааны сааһылаан, ыраастык суруйарга үөрэппитэ. Кэриэктэрбит Наташа Евдокимова Маҕантан кэлэн үлэлиирэ, киһиэхэ истиҥ, сымнаҕас сыһыаннааҕа.

Ил Түмэн бэрэссэдээтэлэ Николай Соломов этэ, норуот дьокутааттарыгар кыһалҕалаах дьон кэлэрэ, көтөҕүнэн сурук киирэрин ырытыһаллара. Дьокутааттары кытта командировкаларга сылдьар этибит, Зоя Корнилованы кытта хаста даҕаны дойдутугар Өлүөхүмэҕэ, Кыыллаах Арыыга баран кэлбитим. Ульяна Винокурова киэҥ далааһыннаах үлэтин сырдатарым. 

Парламент хаһыатын ис хоһооно биллэр эрээри, көҥүл тиэмэҕэ эмиэ суруйарбыт. Талакаан айылҕа баайдаах сирин туһунан элбэҕи хасыһан ааҕан-үөрэтэн, үгүс дьону кытта кэпсэтэн, мунньахтарга сылдьан, хас даҕаны матырыйаал оҥорбутум. Бырамыысыланнас, экэниэмикэ туһунан биирдэ ылбычча суруйан кэбиспэккин, итинник суруйуу улахан үлэттэн, тиэмэтигэр киирэн, ону үөрэтииттэн, чинчийииттэн тахсар. Ыстатыйабыттан быһа тардыыны Иван Николаев кинигэтигэр киллэрбитин көрөн соһуйбутум, онон итинник үлэ сыаналанар.

Маны таһынан, култуура эйгэтин сырдатыахпын баҕарарым, ити тиэмэбин туппутунан «Наше время» хаһыакка көспүтүм. Уопсайа «Ил Түмэн» хаһыакка үс сыл үлэлээбитим тухары айар эйгэҕэ иитиллэн, суруналыыстыка улахан оскуолатын ааһан, идэбин баһылаан, хаачыстыбалаах матырыйааллары оҥорор буола үөрэммитим.

Онтон Вика парламент хаһыатыттан кынат анньынан, саҥа бырайыак толкуйдаан, тэлэбиидэнньэҕэ барбыта.

«Ил Түмэн» хаһыат эрэдээксийэтэ хас да дьон аналын көрүһүннэрэн, ыал оҥортообута, Аркадий Лебедев, Дьулустаан Старостин кэргэннэрин кытта манна билсэн, олохторун оҥостубуттара.

Константин Федоров оскуолатын ааспытым

Виктория Контоева, «Якутскэнерго» дьыалаҕа управлениетын салаатын начаалынньыга, Халыма-Индигиир уокуругуттан норуот дьокутаата Гаврил Алексеев уопсастыбаннай көмөлөһөөччүтэ:

— Үөрэхпин саҥа бүтэрэн баран бастакы үлэлээбит тэрилтэбин, биир идэлээхтэрбин, эрэдээктэри солбуйааччы Туйаара Федорованы, Альберт Степанов – Куорат уолун, Михаил Слепцову о.д.а. сорохторо төһө даҕаны аттыбытыгар суохтарын иһин сылаастык саныыбын, эрэдээктэрбитигэр Константин Федоровка махтанабын. Кини ыллыктаах сүбэтинэн суруналыыстыкаҕа үлэбин саҕалаабытым, тэлэбиидэнньэҕэ бастакы хардыыларбын оҥорорбор эмиэ улаханнык көмөлөспүтэ, ити эйгэттэн тахсыбыт Константин Федоров оскуолатын ааспыт, бэлиитикэҕэ быһаарсар диэн үлэҕэ ылбыттара. Онон «Саха» НКИК үлэҕэ киирэрбэр куонкуруһу этэҥҥэ ааспытым.

Оччолортон баччаҕа диэри талааннаах суруналыыстар Битээлий Сур, Уйбаан Гаврильев, Аркадий Лебедев о.д.а. идэлэринэн айымньылаахтык үлэлии сылдьаллар. 

«Ил Түмэн» хаһыат эрэдээксийэтэ араас сиринэн көһө сылдьан олорбута, эдэр кэлэктиип биир дьиэ кэргэн курдук этибит, планерка уһун-киэҥ мунньах буолааччы, бэлиитикэни, уопсастыба олоҕун ырытыһааччыбыт, ол биһиги сайдарбытыгар улахан оруолу оонньообута. 2000 сылларга наһаа чаҕылхай дьокутааттар Ульяна Винокурова, Августа Марфусалова, Юрий Готовцев, Василий Филиппов о.д.а. үлэлээн ааспыттара, кинилэртэн Владимир Прокопьев билигин даҕаны үлэлии сылдьар. Өрөспүүбүлүкэ уопсастыбаннай-бэлитиичэскэй диэйэтэллэрин кытта атах тэпсэн олорон кэпсэппит дьоллоохпун.

СГУ суруналыыстыка салаатыгар бииргэ үөрэммит оҕолорбун Ньургуйаана Стручкованы, Дьулустаан Старостины, Наташа Федорованы, Лена Володкинаны кытта үлэбитин манна саҕалаабыппыт, кынат анньынан тахсыбыппыт.

Саха тылын сүөгэйин-сүмэтин илдьэ сылдьар Лена Григорьеваны, буҕаалтыр Полина Винокурованы кытта бэркэ тапсан, дьүөгэлэһэн бииргэ үлэлээбиппит. Ол иһин дьон хамнас хаһан кэлэрин миигиттэн ыйыталаһааччылар, идэлээх сойууспутугар бэрэссэдээтилинэн үлэлии сылдьыбытым, бары тэрээһиннэргэ эдэрдэр кыттар этибит, сурутуу хампаанньата, пиар аахсыйата олус сэргэхтик барааччы.

«Ил Түмэн» хаһыакка үс сыл үлэлээбит багааһым, уопсастыбаннай-бэлитиичэскэй олох тугунан тыынан олорорун барытын билэрим  тэлэбиидэнньэҕэ наһаа көмөлөспүтэ.

Мин билигин суруналыыстыкаҕа үлэлээбэппин, пресс-сулууспаттан эмиэ тэйбитим эрээри, бу эйгэ миэхэ өрүү чугас. Ону таһынан, Ил Түмэҥҥэ кыттыгастаах курдук сананабын, «Якутскэнерго» генеральнай дириэктэрэ Гаврил Николаевич норуот дьокутаатын быһыытынан уонтан тахса сыл үлэлиирин тухары уопсастыбаннай көмөлөһөөччүнэн үлэлиибин. Кини ыраах Аартыка улуустарыгар дьокутаат, хоту эҥээр дьон туох кыһалҕалааҕын быһаарабыт, нэһилиэнньэни, улуустары, сонуннары киэҥ эйгэҕэ тарҕатар ситими кытта үлэни сүрүннүүбүн.  Дьокутаат түбүктээх үлэтигэр кылааппын киллэрэбин.