Уопсастыбаннас, өрөспүүбүлүкэ бас-көс дьоно, норуот дьокутааттара Өрөспүүбүлүкэ уйгулаах олоҕун уһансыбыт дьоммутун ааттарын ааттаан, тумус туттан, ытыктабылларын биллэрдилэр.
Ол курдук, Максим Кирович Аммосов пааматынньыгар үгэскэ кубулуйбут сибэкки дьөрбөтүн ууруу сиэрэ-туома өрө күүрүүлээхтик ааста, дьон-сэргэ, ыччат үөрэн-көтөн, өрө көтөҕүллэн тарҕаста. Ил Түмэн бэрэссэдээтэлэ Алексей Еремеев Ил Түмэн салалтатын, норуот дьокутааттарын аатыттан университет үлэһиттэригэр, устудьуоннарыгар истиҥ эҕэрдэтин эттэ.
Бу күн Саха Өрөспүүбүлүкэтин судаарыстыбаннай суверенитетын туhунан Декларацияны ылыммыта. Декларация Саха сирин Россия Федерациятын састаабыгар судаарыстыба быһыытынан биллэрбитэ, Саха Өрөспүүбүлүкэтин саҥа Төрүт сокуонун оҥорууга, аныгы Федеративнай судаарыстыбаннас оҥкулун уурбут федеративнай сөбүлэһиини туһэрсиигэ төрүөт буолбута. Өрөспүүбүлүкэ бэйэтин социальнай-экономическай сайдыытын, нэһилиэнньэ олоҕун-дьаһаҕын тупсарыы сүрүн хайысхаларын бэйэтэ быһаарынар кыахтаммыта. Бүгүҥҥү бэлиэ күҥҥэ биһиги өрөспүүбүлүкэбит судаарыстыбаннаһа олохтонуутугар олук уурбут дьоммут – Максим Аммосов, Платон Ойуунускай, Исидор Баранов, Степан Аржаков уонна да атыттар ааттарын махталынан ааттыыбыт.
Хотугулуу-Илиҥҥи университекка сыл аайы Максим Аммосов аатынан бастыҥ устудьуоҥҥа стипендия көрүллэр.
Хаартыскалар ХИФУ пресс-сулууспатыттан
-
0
-
0
-
0
-
0
-
0
-
0
