Уопсастыба

Быйылгы быыстапка-дьаарбаҥка саха судаарыстыбаннаһын төрүттэспит, 1932-1937 сс. сир оҥоһуутун наркомунан (билиҥҥинэн тыа хаһаайыстыбатын миниистиринэн) үлэлээбит Степан Аржаков төрөөбүтэ 125 сылыгар ананан ыытыллар. Киин куораттан уонна улуустартан чааһынай, бааһынай хаһаайыстыбалар, тыа хаһаайыстыбатын кэпэрэтииптэрэ, астыыр-таҥастыыр хампаанньалар итиэннэ аныгы алаас оҕолорун иитэн таһаарар агрооскуолалар бэйэлэрин бородууксуйаларын: үүт-эт, бурдук астарын, балыктарын, мүөттэрин, чэйдэрин, оҕуруоттарын аһын уо.д.а. аҕаланнар атыылыыллар. Ону таһынан күн ахсын анал бырагырааманан араас култуурунай тэрээһиннэр, маастар-кылаастар, ураты бүлүүдэлэр дегустациялара ыытыллалар. Холобур, бэҕэһээ Тыа хаһаайыстыбатын уонна ас-үөл бэлиитикэтин министиэристибэтигэр астыыр-таҥастыыр тэрилтэлэр сүбэ мунньахтара буолбута, ол туһунан сиһилии  "Ил Түмэн" хаһыат кэлэр нүөмэригэр ааҕыаххыт.

Быыстапка-дьаарбаҥка аһыллыыта бүгүн, Саха Өрөспүүбүлүкэтин Судаарыстыбаннаһын күнүгэр тоҕооһуннаран, тэрилиннэ.

– Ил Дархан Айсен Николаев тыа хаһаайыстыбатын сайыннарыыга ураты болҕомтотун уурар, олохтоох оҥорон таһаарар бородууксуйа бары көрүҥүн элбэтэр соругу туруорар. Бастатан туран, аһын-үөлүн бэйэтэ хааччынар норуот бигэ туруктаах буолар. Хас биирдии ыал остуолугар сибиэһэй, экология өттүнэн ыраас, олохтоох ас-үөл баар буолуохтаах. Биһиги бары ол туһугар үлэлии-хамсыы сылдьабыт. Тыа хаһаайыстыбатын кэлим сайдыытын бырагырааматын үбүлээһин кээмэйэ сыллата эбиллэр, быйыл 15 млрд солкуобайга тэҥнэстэ. Биһиги норуоппут тирэҕэ тыа сирэ, норуоппут кэскилэ тыа сирин, тыа хаһаайыстыбатын сайдыытыгар олоҕурар, – диэтэ Бырабыыталыстыба Бэрэссэдээтэлин солбуйааччы Сергей Местников.

–  Быйылгы быыстапка-дьаарбаҥка саха чулуу уола Степан Аржаков төрөөбүтэ 125 сылыгар ананар. Кини сир оҥоһуутун наркомунан алта сыл, бастакы холкуостары, МТС-тары тэрийэр, тыа хаһаайыстыбатын научнай төрүккэ олоҕуран, былааннаан сайыннарыы ыллыгар киллэрэр саамай эппиэттээх, быһаарыылаах хамсааһыннары таһаарар сылларга үлэлээбитэ. Сарсын АГАТУ ипподромугар ат сүүрүүтэ тэриллиэҕэ, ити сиргэ аты сүүрдүүнү аан бастаан нарком  Степан Максимович  тэрийбитэ. Норуоту, саха дьонун сомоҕолоору. Ол тэрээһин күн бүгүҥҥэ диэри салҕана турарыттан бары үөрэбит, аны даҕаны ыытылла туруоҕар эрэнэбит, – диэтэ тыа хаһаайыстыбатын уонна ас-үөл бэлиитикэтин миниистирин солбуйааччы Николай Афанасьев.

Бу күн астыыр-таҥастыыр тэрилтэлэргэ ыытыллыбыт бастакы куонкурус түмүгэ таһаарылынна. Бөдөҥ хампаанньаларга бастыҥ тэрилтэнэн «Дьокуускайдааҕы килиэп кэмбинээтэ» аахсыйалаах уопсастыба, орто киэптээх тэрилтэлэргэ – Нам улууһун «Эрэл» кэпэрэтиибэ, дьоҕус тэрилтэлэргэ – Томпо улууһун «Илгэ» кэпэрэтиибэ ааттаннылар.

Быыстапка-дьаарбаҥкаҕа 13 агрооскуола кытынна, бэртээхэй павильоннары тарданнар, үлэлэрин-хамнастарын толору сырдаттылар.  Хамыыһыйа быһаарыытынан кинилэртэн Хаҥалас улууһун II Малдьаҕар агрооскуолата «Бастыҥ пришкольнай учаастак», Горнай улууһун Маҕарас агрооскуолата «Бастыҥ пиэрмэ», Хатас агрооскуолата «Бастыҥ бородууксуйа» номинацияларынан бэлиэтэннилэр.

Сүөһү иитэр хаһаайыстыбаларга: «Дьиэ кэргэн бастыҥ пиэрмэтэ» диплом үһүс истиэпэнинэн Мэҥэ Хаҥалас улууһуттан Наталья Данилова, иккис истиэпэнинэн Амма улууһуттан Пелагея Иванова, I истиэпэнинэн Ньурба улууһуттан Любовь Иванова дьиэ кэргэнинэн бааһынай хаһаайыстыбалара наҕараадаланнылар.

Өрөспүүбүлүкэтээҕи «Ас-үөл – 2024» быыстапка-дьаарбаҥка балаҕан ыйын 29 күнүгэр диэри үлэлиэҕэ. Төһө бородууксуйа батарыллыбыта, салааларынан ханнык хаһаайыстыбалар кыайбыттара-хоппуттара онно таһаарыллыаҕа. Киин куорат олохтоохторо уонна ыалдьыттара, өрөбүл күннэргэ онно сылдьаҥҥыт кыстыыр аскытын хааччыныҥ, быыстапка-дьаарбаҥка тэрээһиннэригэр көхтөөхтүк кыттыҥ.

Хаартыскаҕа Анна Сергучева уонна ааптар түһэриилэрэ.