Биэс сыл анараа өттүгэр нууччалыы хаһыаты эрэдээктэр Александра Бурнашева, сахалыы тыллаах хаһыаты Мария Баишева сүрүннээн таһаараллара. Верстальщиктар Коля Копылов, Василий Прокопьев хаһыаты таҥаллара. Суруналыыстартан Ира Ханды (Борисова), Сардаана Кузьмина, Ирина Романова, Лена Воробьева о.д.а. үлэлээбиттэрэ диэн Григорий кэллиэгэлэрин саныыр.
«Мин кэлэрбэр СӨ Олох-дьаһах, хомунаалынай хаһаайыстыба уонна энэргиэтикэ министиэристибэтин кытта биир дьиэҕэ төрдүс этээскэ олорбуппут. Бу кэм устатыгар Ил Түмэн Бэрэссэдээтэлэ Петр Гоголев, Алексей Еремеев кэлэктииби кытта көрсөн, хаһыат сайдар тосхоллорун дьүүллэспиттэрэ. Ил Түмэн вице-спикерэ Юрий Николаев, норуот дьокутаата Андрей Находкин, аппараат салайааччыта Андрей Антонен, Уус Алданнааҕы дьокутааттар сэбиэттэрин бэрэссэдээтэлэ Иван Колодезников сурутуу хампаанньатыгар үгүстүк көмөлөспүттэрэ.
2019 с. сыл аҥаара үлэлээбитим кэнниттэн салайааччыбыт Наталья Романовна Ил Түмэҥҥэ үлэлии барбыта. Генеральнай дириэктэринэн-кылаабынай эрэдээктэринэн Мария Христофорова кэлэн, шеф-эрэдээктэринэн СӨ Суруналыыстарын сойууһун салайааччытынан үлэлии олорор Галина Бочкареваны анаабыта.
Ити кэмтэн ыла элбэх киһи барбыта-кэлбитэ, буҕаалтырдар, айар үлэһиттэр уларыйбыттара. 2020 с. сайыныгар Бизнес-кииҥҥэ көспүппүт, хамсык кэмигэр дьиэҕэ олорон үлэлээбиппит, онтон 5-6 киһи Москубаҕа акселераторга үөрэнэн кэлбиттэрэ. «Сахапарламент» сайт аһыллыбыта, «Голос Якутии», «Пульс Якутии», «Якутия помнит/Саха Сирэ умнубат» саҥа бырайыактары оҥорбуппут, видеосюжет устар буолбуппут. Бүлүүгэ Булуус курдук Муус аппа бырайыагын саҕалаабыппыт.
Сурутууну элбэтэргэ ыраас ууну таһар сулууспаны кытта кэпсэтэн, ыал аайы хаһыаты тиксэрэр буола сылдьыбыппыт.
Инникитин хаһыат ыыра кэҥээн, аартыга улаатан иһэригэр баҕарыам этэ. 25 сыл тухары «Ил Түмэн» хаһыаты үктэл оҥостон салайар үлэһиттэр, чаҕылхай суруналыыстар таҕыстылар. Өссө даҕаны эдэр дьоҥҥо суолу арыйа, саҥа талааннары саҕа турдун», - диэн Григорий баҕа санаатын тиэрдэр.
Хаартыска эрэдээксийэ архыыбыттан.
-
0
-
0
-
0
-
0
-
0
-
0
