Евдокия Иннокентьевна Таатта оройуонугар, Уус Амма нэһилиэгин Түөнэкэй учаастагар биэс кыыс оҕолоох Марина Егоровна уонна Иннокентий Дмитриевич Бястиновтар дьиэ кэргэннэригэр, иккис оҕонон 1929 с. төрөөбүтэ. Онон быйыл 95 сааһын туолла. 1937 с. Чычымах оскуолатыгар үөрэнэ киирбитэ. Сэрии сылларыгар аҕалара эрдэ өлөн, сэттис кылааска үөрэнэ сылдьан үөрэҕиттэн тохтуурга күһэллибитэ. Оччолорго ийэтэ “Ньургуһун” холкуоска ыанньыксыттыыра, кыыс ийэтин ынахтарын тутан, холкуоска чилиэнинэн киирэн, бэйэтэ бас билэр уонча ынахтаах ыанньыксыт буолбута. Итинтэн ыла кини үрүҥ илгэни дэлэтэр үйэтэ саҕаламмыта. “Коммунизм" сопхуос Харбалаахтааҕы отделениетыгар “Саха АССР 50 сыла” ыанньык пиэрмэтин салайан үлэлэппитэ. Биир фуражнай ынахтан 1000 киилэ үүтү ыыр иһин таһаарыылаах үлэни саҕалаабыта.
Сыһыарыллыбыт ынаҕын ахсыттан бастаан 1000, онтон 1200-1500 киилэ үүтү ыабыта, салгыы 2000-лаах кирбиигэ үктэммитэ. Биир сыл 2400 киилэ үүтү ыан, оройуоҥҥа бастаабыта. Биэс сыллаах былаанын болдьоҕун иннинэ толорон, баалабайынан 38 туонна үүтү ыан, онус бэтилиэккэ суотугар туттарбыта. 1967 сылтан ССКП чилиэнэ буолбута. Ити курдук, Евдокия Иннокентьевна холкуоска, сопхуоска барыта 40 сыл илиитин араарбакка үлэлээбитэ.
Сыралаах үлэтэ үрдүктүк сыаналаммыта, 1965 с. «Саха АССР бастыҥ ыанньыксыта», сүөһү иитиитин бастакы кылаастаах маастара, коммунистическай үлэ ударнига, “Саха АССР норуотун хаһаайыстыбатын үтүөлээх үлэһитэ” буолбута. “Үлэҕэ килбиэнин иһин” мэтээлинэн, “Үлэ Кыһыл Знамята” уордьанынан наҕараадаламмыта. Кини сыралаах үлэтин социалистическай куоталаһыы кыайыылааҕын аалай линтэлэрэ, грамоталар, махтал суруктар туоһулууллар.
Үрдүк көрдөрүүлээх бастыҥ ыанньыксыт Саха АССР тохсус ыҥырыылаах Үрдүкү Сэбиэтин дьокутаатынан талыллан, тустаах үлэтин таһынан, быыбардааччыларын накаастарын толорууга үтүө суобастаахтык үлэлээбитэ-хамсаабыта.
“Үлэ Кыһыл Знамята” уордьан кавалера, Саха АССР норуотун хаһаайыстыбатын үтүөлээх үлэһитэ Евдокия Иннокентьевна Федосееванан биһиги киэн туттабыт. Бырааттыы Мординовтар ааттарын сүгэр түмэлгэ кини мэтириэтэ үйэтитиллэн, пуондаҕа киирбитэ.
Евдокия Иннокентьевна икки оҕолоох. Кини олоҕун сиэннэрэ, элбэх хос сиэннэрэ салгыыллар.
-
5
-
1
-
0
-
0
-
0
-
0
