Быйылгы дьаарбаҥка Хомсомуол болуоссатыгар бэҕэһээҥҥиттэн саҕалаан буола турар. Киһи элбэх. Араас улуустартан бас билии көрүҥүттэн тутулуга суох араас хаһаайыстыбалар ынах сүөһү, убаһа этин уонна балык арааһын аҕалан атыылыыллар.
Сүөһү аҥаарынан, атаҕынан ылар дьоҥҥо табыгастаах буоллун диэн, эти эрбээн биэрэр сыах үлэлиир. Төлөбүрүн уу харчынан биитэр карточканан ылаллар.
Сыана араас, хол, буут, ойоҕос, уҥуохтаах уонна куҥ эт диэн араарыллан сыаналаммыт. Балык эгэлгэтэ баар, сыана эмиэ араас. Булуҥ бэрэстэбиитэллэрэ тоҥ балыгы таһынан ыыһаммыт балыгы уонна таба этин аҕалбыттар. Өссө электрическэй оһоҕу холбоон, таба этин ыһаарылаан сырдьыгынатан, дьаарбаҥкаҕа кэлбит дьону күндүлүүллэр.
Дьаарбаҥка сарсын эмиэ үлэлиэҕэ, онон куорат олохтоохторун кэлэҥҥит, эттэ уонна балыкта атыылаһыҥ, кыстыыр аскытын хааччыныҥ диэн Тыа хаһаайыстыбатын уонна ас-үөл бэлиитикэтин министиэристибэтэ ыҥырар.
Хаартыскаҕа ааптар түһэриитэ
-
3
-
0
-
0
-
0
-
0
-
0
