Худуоһунньук Игорь Гаврильевич Константинов «Айылҕа абылыыр күүһэ» быыстапката аата да этэринии айылҕаны кытта ыкса сибээстээх хартыыналар тулалаабыттарынан кэрэһилэнэр. Идэлээх худуоһунньуктар бэлиэтээбиттэринэн, Игорь Гаврильевич холусталарыгар айылҕа күүһэ - кэрэтэ, нарына - тыйыһа барыта көрөөчүнү бэрт итэҕэтэрдии уонна умсугутардыы көрдөрүллэлэр. Худуоһунньук Хаҥалас улууһун Көрдөмүгэр күн сирин көрөн, бу сэтинньи 18 күнүгэр 60 сааһын туолан, быйыл дьоро сыла тосхойбут диэн үөрэ бэлиэтиэххэ сөп - кулун тутарга Арассыыйа худуоһунньуктарын сойууһун чилиэнинэн талыллыбыт, дойдутугар Көрдөмҥө, улуус киинигэр Покровскайга Наум Зосимов аатынан художественнай галереяҕа персональнай быыстапката туруоруллубут.
Оскуолаҕа үөрэнэр сылларыттан живописька умсугуйан, уруһуй учуутала Вадим Петрович Адамов киистэни тутарга үөрэтиэҕиттэн ыла таптыыр дьарыгын куруук бэйэтин кытта илдьэ сылдьан, ханна да, хайа да сиргэ үлэлээтэр, айылҕатын уруһуйдаан, иэйэн-куойан хартыына гынан дьонугар-сэргэтигэр утары уунан кэллэ.
Быыстапка аһыллыытын туһунан бэлиэтиир буоллахха, Көрдөмнөр бэркэ бэлэмнэнэн кэлбиттэр, Р. Захаров аатынан олохтоох мусуойтан, «Ситим» култуура кииниттэн кэлэн ырыанан эҕэрдэлээтилэр, нэһилиэк дьаһалтатын эҕэрдэтин тириэртилэр, алгыстарын анаатылар. «Айар кут» суруйар, айар түмсүүттэн көхтөөх кыттааччылар кэлэн худуоһунньук хартыыналарынан бэйэлэрэ анал хоһооннорун ааҕан иһитиннэрбиттэрин долгуйа иһиттибит -тыл, хартыына абылаҥа биир дьүөрэ буолан ситэрсэн, дорҕооннуун сиэттиһэн куйаарга көтөллөрүн.
Ону тэҥэ, худуоһунньук персональнай быыстапката аһыллыбытынан СӨ Национальнай музейыттан, СӨ худуоһунньуктарын сойууһуттан кэлэн эҕэрдэ тылларын анаатылар.
Ил Түмэн билиҥҥи VII ыҥырыытын дьокутаата, РФ Наукатын академиятын Сибиирдээҕи салаатын Саха Сиринээҕи Киинин генеральнай дириэктэрин көмөлөһөөчүтэ Тихон Скрябин эҕэрдэлээн тыл эппитин бэлитиэххэ сөп. Тихон Николаевич Көрдөм оскуолатыгар үөрэммитин, ол кэмҥэ эдэркээн Изабелла уонна Игорь Константиновтар үлэлии кэлбиттэрин, эдэркээн дьон тэлгэһэлэригэр оскуола оҕолоро, уолаттара куруук мусталларын, көмө-тирэх, сүбэ-ама буолбуттарын махтана аҕынна. Изабелла Афанасьевна педагог, Игорь Гаврильевич уһуйааччы быһыытынан үүнэн көлүөнэни иитигэ үгүс үлэни ыыппыттарын уонна салгыы үлэлэһэллэрин чорботон бэлиэтээтэ.
Худуоһунньук Игорь Константинов быыстапката сэтинньи 22 күнүттэн ахсынньы 22 күнүгэр диэри Национальнай бибилэтиэкэ үһүс этээһигэр быыстапка саалатыгар туруоҕа, онон кэлэҥҥит кэрэ кэрэни үксэтэрин көрүҥ, кэрэхсээҥ.
Быыстапка туһунан сиһилии «Ил Түмэн» парламент хаһыатын сэтинньи 29 күнүнээҕи нүөмэригэр тахсыаҕа.
Алексей МАТВЕЕВ,
Хаартыскаҕа ааптар түһэриилэрэ.
-
5
-
1
-
0
-
0
-
0
-
0
