Уопсастыба

Мин сурукпун суумкабар уктаат айаммын салҕаатым. Дьиэбэр тиийэммин суругу дьэ сыныйан көрдүм. Бастакы сирэйигэр “Лично тебе Письмо особой важности!” диэн суруктаах бэрт кыраһыабай оҥоһуулаах аккырыыкканы эргитэ туппутум кэннигэр “С чем у тебя ассоциируется этот праздник? Елка. Подарки. Скидки. Снег. Застолье. Дед Мороз. Что такое Рождество на самом деле?” диэн ыйытыылардаах.

Маны ааҕан бараммын: “Кырдьык даҕаны... Ороһооспо диэн туох бырааһынньыгай, ис дьиҥэ туохханый?”, - диэн бэйэбиттэн ыйыттым эрээри, бу диэн биир бигэ хоруйга кэлбэтим. Өйдөөн ылбытым, мин хаһан даҕаны сыаркапка ыытыллар таҥара сулууспата диэҥҥэ сылдьан көрбөтөх эбиппин. Аны туран, ити саха киһитэ тоҕо христиан итэҕэлин ылыммыта буолла диэн ыйытыы үүйэ-хаайа тутта. Билиэх-көрүөх баҕам уһуктан, болдьохтоммут күҥҥэ сыаркапка баран, көрөн-истэн кэлэргэ сананным.

Дьэ, “Местная религиозная организация христиан веры евангельской “Христианская Церковь Благословение” г. Якутска” диэн толору ааттаах сиргэ тиийдим. Мин санаабытым курдук киэҥ-куоҥ, хас да этээстээх, улахан куупаллардаах дыбарыас буолбатах эбит. Сыаркап дьиэтэ дьоҕус буолан биэрдэ. Онно араас омук дьоно, эдэр-эмэн, оҕо-уруу мустубут.

Киирээппин кытта били уулуссаҕа билсибит Николайым көрүстэ. Таҥара сулууспата саҕаланыан иннинэ кыратык кэпсэтэн ыллыбыт. Кини кэпсииринэн, олоҕор балай эмэ ыарахаттары көрсүбүт киһи эбит. Дьиҥэ кыахтаах ыал оҕото, син дьон тэҥинэн ыал буолан, оҕо-уруу төрөтөн олоҕун оҥостубут. Ол эрэн, буор иһээччи буолан, аймахтарын, доҕотторун кэлэтэн, дьоно-сэргэтэ суох хаалан, уулусса киһитэ буолбут. Син сырдыкка талаһан, хаста эмит арыгытын эмтэтэ сатаабыт да, хара дьай хам ылбытын ыһыктыбатах. Ити курдук, олох саамай түгэҕэр түспүттүү сананан, ускул-тэскил сырыттаҕына, кинини биир киһи көрсөн: “Таҥара эйигин таптыыр, сыаркапка кэл”, - диэн ыҥырбыт. Манна кэлэн Николай муҥура суох тапталлах Дьиҥ Таҥара баар эбит диэн итэҕэйбит уонна көнөр суолга туруммут. Билигин, хаһан эрэ бэйэтин курдук, муна-тэнэ, дьиэтэ-уота суох сылдьар дьоҥҥо сыаркап чөлүгэр түһэриитин (реабилитация) ааһан олохторун саҥалыы оҥостоллоругар көмөлөһөр эбит. “Биһиэхэ үксүн араас түгэннэртэн охсууну ылбыт дьон кэлэллэр. Итэҕэл күүһүнэн тиллэллэр. Билигин сыаркаппыт быһа холоон 70-ча чилиэннээх. Бары биир дьиэ кэргэн курдукпут”, - диэн кэпсиир Николай.

Сыаркап дьоҥҥо көмөлөһөр үлэтин туһунан, күндү ааҕааччым, туспа суруйуом диэн эрэннэрэбин, онон тиэмэттэн халыйбакка Ороһооспобутугар төннүөх.

Ороһооспотооҕу таҥара сулууспата

Миэхэ, дьиҥ сахалыы толкуйдаах-санаалаах, төрүт итэҕэллээх киһиэхэ атын итэҕэл соччо интэриэһинэйэ суох буолуо дии санаабытым. Ол гынан баран, Ороһооспотооҕу таҥара сулууспата бэрт сэргэх буолан биэрдэ. Сулууспа Ытык малыыппа ырыаларын (псалом) толорууттан саҕаланна. Ол кэннэ сыанаҕа оҕолор кыралыын-улаханныын тахсаннар Иисус Христос туһунан хоһоон аахтылар. Үөрүүлээх сулууспаны сыаркап Диакона Дмитрий (Д. Червяков) иилээн-саҕалаан ыытта. Бөлөрүүссүйэ сиэркэбин сулууспалааҕа Валерий Пташиц уоттах-күөстээх, өрө күүрүүлээх тылы этэн, псаломнары ыллаан дьону сэргэхситтэ. Сулууспа бүтүүтэ Пастор Олег (Олег Прохоров) түмүк тылы эттэ, малыыппа аахта.

Ырыаһыттар кэрэ куоластара, оҕолор чаҕаархай саҥалара, итэҕэйээччилэр малыыппалара – бу барыта Ороһооспо, ытык аналынан, Иисус Христос төрөөһүнүн уруйдуур бырааһынньык буоларын туораттан көрөр киһиэхэ бэрт тиийимтиэтик уонна итэҕэтиилээхтик тириэртэ.

Таҥара Уолун төрөөһүнэ хайдах этэй?

Күн сиригэр дьон аньыылара-харалара элбээн дууһаларын күүһэ уостубута, айылҕаттан бэриллибит үтүөҕэ тардыһыылара мөлтөөбүтэ. Маныаха, Таҥара ураты кыттыһыытынан эрэ киһи аньыыттан босхолонор кыахтааҕа. Онон дьону муҥура суох таптыыр Таҥара Аан дойдуга Бэйэтин Уолун ыытар.

Ол курдук, Христос ийэтэ Мария Иосифтыын илии охсуһарыгар Сибэтиэй Тыынтан хат эбит. Ону Иосиф таҥарамсах буолан уонна Марияна дьон тылыгар угумаары, кистээн бэйэтиттэн дьалты ыытаарга санаммыт. Онуоха, Иосиф түүлүгэр Таҥара Аанньала киирбит уонна: “Давид уола Иосиф! Марияны кэргэн ылартан куттаныма, тоҕо диэтэргин, киниэхэ баар оҕо Сибэтиэй Тыынтан бэриллибит. Уолу төрөттөҕүнэ Иисус диэн ааттаар, Кини дьону аньыыларыттан быыһыаҕа. Оннук буоллаҕына, Айыы Тойон бороруок нөҥүө эппитэ туолуоҕа: “Бу Кыыс хат буолан Уолу төрөтүөҕэ, итиэннэ Кинини Эммануил диэн ааттыахтара, ол аата “Таҥара биһигини кытта баар” диэн суолталаах”. Иосиф уһуктан баран Таҥара Аанньала эппитин толорбут уонна Уолу Иисус диэн ааттаабыт” (Евангелия от Матвея 1:18-25).

Иисус Христос диэн кимий?

Иисус Христос диэн Киһи буолан төрөөбүт Таҥара. Кини аньыыта суох сирдээҕи олоҕу олорон, дьону эмтээн, үөрэтэн үгүс үтүөнү оҥорбута.

Киниэхэ улуутумсуйуу да, баай-дуол да суоҕа, ол эрээри Кини туһунан Аан дойду барыта билэр. Кини төрүөхтээҕин элбэх бороруок өтө көрөн эппитэ. Төрүүр түүнүгэр Аанньаллар хуорунан ыллаабыттара. Оҕо сылдьан Кини бэйэтин бириэмэтин учууталларын толкуйга түһэрэрэ, сөхтөрөрө. Сиппит-хоппут кэмигэр долгун устун хааман, тыалы соруйан, муораны уҕарытан айылҕа күүһүн салайара. Кини буор-босхо, өҥөлөрүн иһин төлөбүр ылбакка эрэ, элбэх киһини үтүөрпүтэ. Биир да кинигэни суруйбатаҕа, ол эрээри, Кини туһунан суруллубут кинигэлэри ханнык да бибилэтиэкэ бэйэтигэр батарыа суох этэ. Бэйэтэ ырыа айбатаҕа, ол гынан баран, биир да киһиэхэ анамматах элбэх ахсааннаах ырыа Киниэхэ анаммыта. Биир да оскуоланы төрүттээбэтэҕэ, ол эрээри, Кини курдук элбэх үөрэнээччилээҕинэн ханнык да Аан дойду оскуолата хайҕанар кыаҕа суох. Хаһан даҕаны аармыйаны хамаандалаабатаҕа, саллааттары ыҥырбатаҕа, ол гынан баран, Кини туһугар олохторун биэрэргэ баҕалаах дьонноох биир да судаарыстыбаннай диэйэтэл суох. Кини хаһан даҕаны уйулҕа үөрэҕинэн дьарыктамматаҕа, ол эрээри, Аан дойду бары эмчиттэрэ эмтээбиттэриттэн сүрэҕэр баастаах элбэх дьону чөлүгэр түһэрбитэ. Кини аата – Иисус Христос.

Иисус Христос туохха да буруйа суох эрээри аньыылаах киһи оннугар Кириэскэ тиириллэн эрэйдээх өлүүнү бэйэтигэр ылыммыта. Бу быһыытынан Кини күн сиригэр олорбут, олорор, олоруохтаах дьон аньыытын-харатын бэйэтигэр ылбыта.

“Ибо так возлюбил Бог мир, что отдал Сына Своего Единородного, дабы всякий, верующий в Него, не погиб, но имел жизнь вечную.” (Евангелия от Иоанна 3:16), - диэн “Новый завет” Ытык сурук кинигэтигэр суруллубут.

***

Онон чахчы, киһи-аймаҕы Быыһааччы, Таҥара Уола Иисус Христос төрөөбүтүн дьиҥ кырдьык бэйэтигэр ылыммыт, Киниэхэ итэҕэйэр дьоҥҥо тохсунньу 7 күнэ Ытык үөрүү күнүнэн буолар.

Онтон мин Ороһооспо дьиктитин, бу сырдык бырааһынньык ис дьиҥин билсиспиппэр уулуссаҕа соһуччу көрсүбүт Николайга махтана хааллым.

Антонина НЕУСТРОЕВА

Хаартыскалар ааптар түһэриитэ уонна куйаар ситимиттэн ылылынна