Ураты, бастакы
Ол сиэринэн Тыа хаһаайыстыбатын уонна ас-үөл бэлиитикэтин министиэристибэтигэр мин суруйар-бичийэр биир идэлээхтэрбин кытары сыллата ыҥырыллабын. Быйыл даҕаны эрдэттэн эрэҥкэдийэн төлөпүөнүнэн эрийэн сураспыппар, министиэристибэ пресс-сулууспатын салайааччы Анна Стручкова: «Миниистир ый бүтүүтүн эргин барыгытын ыҥыран, улууска сырытыннарарга былаанныыр», – диэбитэ.
Дьэ онон, тохсунньу 30 күнүгэр Артем Александров сирэй салалтатынан өрөспүүбүлүкэ хаһыаттарын, телевидениетын уонна араадьыйатын тыа сирин, тыа хаһаайыстыбатын сырдатыыга идэтийэр суруналыыстара итиэннэ биллэр блогердар, барыта сүүрбэччэ киһи буолан, Мэҥэ Хаҥалас улууһугар тахсан, хаһаайыстыбаларга сырыттыбыт, кыстык туругун, күннээҕи үлэни-хамнаһы билистибит. Ити курдук министиэристибэ быйылгы Бэчээт күнүн уратытык бэлиэтээтэ. Даҕатан эттэххэ, маннык пресс-туур ааспыт өттүгэр төрүт тэриллэ илигэ.
Сарсыарда 8 чаастан хоҥнон, оптуобуһунан айаннаан иһэн, Артем Александров пресс-туур үлэ саҥа киэптэрин көрдөөһүн, ону сырдатыы чэрчитинэн тэриллибитин быһаарда, бырагырааманы билиһиннэрдэ. Иккис сүрүн соругунан кыстык хаамыытын миэстэҕэ билсии буоларын быһыытынан, министиэристибэ эппиэттээх үлэһиттэрэ: Астыыр-таҥастыыр салаа департаменын салайааччы Егор Чичигинаров, сүөһүнү иитиигэ уонна племенной үлэҕэ департамены салайааччы Василий Бессонов, сиртэн үүнээйини ылыы уонна материальнай-тиэхиньиичэскэй хааччыйыы департаменын салайааччы Вячеслав Гаврильев барсан иһэллэр, инньэ гынан суруналыыстар бары хайысхаларынан интэриэһиргиир ыйытыыларгытыгар толору хоруйу ылыаххыт диэтэ.
Өрөспүүбүлүкэ агробырамыысаланнай комплексын туругун, ааспыт сыллаах үлэ-хамнас түмүктэрин уонна быйылгы сыллаах үлэ былааннарын тустарынан кэпсээтэ. «Саха Өрөспүүбүлүкэтин олохтоох салайыныы уорганнарын муниципальнай оройуоннарыгар уонна куораттааҕы уокуруктарыгар тыа хаһаайыстыбатын оҥорон таһаарар үлэтин-хамнаһын өйөөһүҥҥэ кэккэ судаарыстыбаннай боломуочуйалары биэрэр туһунан» сокуон үс сыл үлэлээн, улуустар харчыны хайдах туһанар көдьүүстээҕэр сөптөөх түмүгү оҥоһуннулар диэн, быйылгыттан кинилэр боломуочуйаларын кэҥэтэн, чорботор хайысхаларын бэйэлэрин быһаарыыларыгар бэрилиннэ. Онон улуустар уонна нэһилиэктэр көрүллүбүт харчыга бэйэлэрин бүддьүөттэриттэн утары үбүлээннэр, үлэни-хамнаһы саҕалыыр кыахтаммыттарын сиһилии быһаарда.
Аллараа Бэстээххэ улуус баһылыга Дмитрий Тихонов көрүстэ. Пресс-туур кыттыылаахтарыгар анаан маннык эттэ:
– Күндү доҕоттор, эһигини Мэҥэ Хаҥалас улууһугар кэлбиккитинэн эҕэрдэлиибин. Биһиги улууспут сэттэ дьоруойдаах. Аҕа дойдуну көмүскүүр Улу сэриигэ олоҕун толук уурбут, Сэбиэскэй Сойуус Дьоруойа Федор Попову бары билэҕит. Өр сыллаах үтүө суобастаах үлэлэринэн уһулуччу көрдөрүүлэри ситиһэн, Социалистическай Үлэ Дьоруойдарын үрдүк аатын ылбыттара – сылгыһыт Афанасий Степанов (1948), болуотунньук Михаил Федотов (1958), агроном Гаврил Самсонов (1957), оҕуруочут Екатерина Новгородова (1973), «Якутзолото» холбоһук начаалынньыга Тарас Десяткин (1979) уонна мэхээнньик, «Үлэ Албан Аата» уордьан толору кавалера Андрей Дмитриев (1990).
2023 сыллаахха биһиги улууска тыа хаһаайыстыбатын үс сыла биллэриллибитэ. Бу үүммүт 2025 сыл түмүктүүр кирбиибит. Сыалбыт аҕа көлүөнэ үлэҕэ ситиһиитин сөргүтэн, инники сайдыыга тирэх ууруу итиэннэ Ил Дархан Айсен Николаев туруорар соруктарын олоххо киллэрии буолар. Барыгытыгар айымньылаах үлэни баҕарабын!
«Айан аргыстаах, суол доҕордоох» буолар диэн мээнэҕэ этиллибэт. Тыа хаһаайыстыбатын управлениетын салайааччы Иннокентий Семенов улууска тыа хаһаайыстыбатын туругун туһунан кэпсээн, ыйытыыларга хоруйдаан, Аллараа Бэстээхтэн Хорообукка диэри айан уһунун билбэккэ хааллыбыт. Эдэр киһи аныгы кэм салайааччыта диэх курдук, биир да кумааҕыны көрбөккө туран, барытын өйүттэн, бэрт элбэх сыыппаранан холобурдаан, улуус үлэтин-хамнаһын бары хайысхаларынан сиһилии итиэннэ сорох суруналыыстар уонна блогердар сахалыы билбэттэрин учуоттаан, нууччалыы тылынан дьэҥкэтик сэһэргээтэ.
Миниистир Артем Александрову кытары биир күн устата пресс-туур кыттыылаахтара ханнык хаһаайыстыбаларга сылдьыбыттарын, тугу көрбүттэрин-истибиттэрин, сөхпүттэрин, ким хас ньирэйи аһаппытын уо.д.а. туһунан сиһилии хаһыат кэлэр нүөмэригэр ааҕыаххыт.
Хаартыскаҕа ааптар уонна Анна Сергучева (ТХАҮөБМ) түһэриилэрэ.
-
0
-
0
-
0
-
0
-
0
-
0