Уопсастыба

Кинигэ биһирэмэ

Ил Дархан Айсен Николаев өссө икки сыллааҕыта, ол эбэтэр 2023 сыл ыам ыйын 1 күнүгэр, Г.И. Чиряев төрөөбүтэ 100 сылын өрөспүүбүлүкэ таһымынан бэлиэтиир туһунан дьаһалы таһаарбыта. Ол дьаһал быһыытынан Бырабыыталыстыба Бэрэссэдээтэлин солбуйааччы Анатолий Семенов бэрэссэдээтэллээх хамыыһыйа тэриллэн, былаан ылыллан, үлэ саҕаламмыта.

Былаан кэрискэтигэр киллэриллибит 48 дьаһалтан биирэ -- «Айар» кинигэ кыһатыгар «Өрөспүүбүлүкэ чулуу дьоно» сиэрийэнэн тахсыбыт «Гавриил Чиряев» диэн кинигэ буолла. Саҥа кинигэ биһирэмэ муус устар 3 күнүгэр Саха Өрөспүүбүлүкэтин Национальнай бибилитиэкэтин историяҕа саалатыгар ыытылынна. Онно үбүлүөйү тэрийэр хамыыһыйа чилиэннэрэ, Ил Түмэн дьокутааттара, Г.И. Чиряев аймахтара, Бүлүү улууһуттан дьаһалта баһылыга Сергей Винокуров салайааччылаах дэлэгээссийэ, Национальнай архыып үлэһиттэрэ, кыраайы үөрэтээччилэр, баартыйа бэтэрээннэрэ, уопсастыбаннас бэрэстэбиитэллэрэ кыттыыны ыллылар.

Сибэкки уонна алмаас

Улахан дьаһаллар муус устар 4 күнүгэр, Гавриил Чиряев төрөөбүт күнүгэр ыытылыннылар. Ол курдук, сарсыарда 11 чаастан Гавриил Иосифович пааматынньыгар тыыннаах сибэкки дөрбөтүн ууруу, тэттик миитин буолла.

Күнүс 2 чаастан «Арассыыйа – мин устуоруйам» диэн устуоруйа комплексыгар архыып матырыйаалларынан уонна түмэл эспэнээттэринэн Гавриил Чиряев олоҕун, үлэтин-хамнаһын сырдатар баай ис хоһоонноох быыстапка аһылынна.

«АЛРОСА» хампаанньа Удачнайдааҕы хайа-байытар кэмбинээтин 2 №-дээх баабырыкатыгар 1995 с. кыһын көстүбүт 68 карааттаах алмааска өрөспүүбүлүкэ социальнай-экэнэмиичэскэй сайдыытыгар, ол иһигэр алмаас бырамыысыланнаһын төрүттээһиҥҥэ сүдү кылаата сыаналанан, Гавриил Чиряев аата иҥэриллибитэ. Үбүлүөй дьаһалларын чэрчитинэн, ол алмаас биһирэмэ «Саха Сирин барҕа баайа» быыстапкаҕа күнүс 4 чаастан тэрилиннэ.

Опера уонна балет тыйаатырыгар

Киэһэ 6 чаастан Гавриил Чиряев төрөөбүтэ 100 сылыгар анаммыт үөрүүлээх мунньахха элбэх киһи кэлбит. Иллэҥ олбох көстүбэккэ, сорохтор саала ойоҕоһугар турдулар.

Гавриил Иосифович олоҕун, үлэтин-хамнаһын туһунан Бырабыыталыстыба Бэрэссэдээтэлэ Кирилл Бычков киэҥ ис хоһонноох дакылааты оҥордо. Ил Түмэн аатыттан парламент спикерын солбуйааччы – Ил Түмэн судаарыстыба тутулугар уонна сокуону оҥорууга сис кэмитиэтин бэрэссэдээтэлэ Афанасий Владимиров тыл эттэ. Ол туһунан сиһилии «Ил Түмэн» хаһыакка ааҕыаххыт.

Хаартыскаҕа Василий Кононов (Ил Түмэн), Саргын Скрябин (ЯСИА) түһэриилэрэ