Мунньахха Арассыыйа Федерациятын тыатын хаһаайыстыбатын миниистирин солбуйааччы Максим Увайдов, министиэристибэ Сир бэлиитикэтигэр уонна бас билиигэ сыһыан департаменын эппиэттээх үлэһиттэрэ, Калуга, Новгород, Тверь уобаластарын салалтатын бэрэстэбиитэллэрэ кыттыыны ыллылар. Тыа хаһаайыстыбатыгар аналлаах сирдэри туһаҕа таһаарыыга туох кыһалҕалар баалларын туһунан кэпсэттилэр.
– Арассыыйа Федерациятыгар тыа хаһаайыстыбатыгар аналлаах сири көдьүүстээхтик туһаныы уонна мелиорация комплексын сайыннарыы судаарыстыбаннай бырагырааматын чэрчитинэн, 2031 сылга диэри 13 мөлүйүөн гектар иэннээх оһорбо сири туһаҕа таһаарар сорук турар. Бу бырагыраама өссө атыннык «Иккис Кырыс сир» бырагыраамата дэнэр, тоҕо диэтэххэ, 1990-с сыллардаахха диэри туһаныллыбыт, үүнүү бөҕөтүн биэрбит, дойдуну аһаппыт мөлүйүөнүнэн гектар иэннээх сирдэр билигин кырыс сир буолан тураллар, – диэтэ Судаарыстыбаннай Дуума аграрнай боппуруостарга кэмитиэтин бэрэсэдээтэлэ Владимир Кашин.
Салгыы кэккэ эрэгийиэннэргэ тыа сирин поселениеларын, ойуур пуондатын уонна ураты харыстанар сирдэр кыраныыссаларын оҥоруу өссө да бүтэ илик буолан, тыа хаһаайыстыбатыгар аналлаах сирдэр чэрчилэрэ быһаарылла иликтэрин бэлиэтээтэ. Ордук элбэх сир чуолаан Киин Арассыыйаҕа, Волгатааҕы федеральнай уокурукка туһаныллыбака сытарын баарын ыйда. Түмүгэр маннык эттэ:
– Сири сөптөөхтүк учуоттааһын көдьүүстээх тыа хаһаайыстыбатыгар, ол иһигэр, быйаҥнаах араҥата сыыйа дьадайан, сыаната чэпчээн иһэр сир ресурсаларын аныгы сыыппара технологиятынан салайыыга тиэрдэр сүрүн уонна саамай уустук суол буолар. Быраҕыллан сытар бааһына, ходуһа сирдэрин туһаҕа таһаарыы, аналларынан, көдьүүстээхтик туһаныы бүтүн дойду үрдүнэн турар судаарыстыбаннай кыһалҕа. Бу – эбии үлэ миэстэлэрин таһаарыы, бородууксуйаны оҥоруу көрдөрүүлэрин үрдэтии уонна бүддьүөккэ нолуок киириитин улаатыннарыы итиэннэ дойду инники сайдыытын уонна куттала суох буолуутун боппуруоһа буолар.
Дьокутааттар бу хайысханан үлэни күүһүрдэргэ, эрэгийиэннэр быраҕыллыбыт бааһыналары, ходуһалары туһаҕа таһаарарга туох үлэни-хамнаһы тэрийэллэрин хонтуруолга ыларга итиэннэ кэмитиэт кэлэр мунньахтарыгар эрэгийиэннэр бэрэстэбиитэллэрин ыҥыран, Бырабыыталыстыба туруорбут соруктарын олоххо киллэриигэ тустаах эрэгийиэн парламенын, салалтатын, АПК салаатын кытары хайдах үлэлииллэрин истэргэ эттилэр диэн Судаарыстыбаннай Дуума саайта суруйар.
Даҕатан эттэххэ, биһиги өрөспүүбүлүкэбитигэр быраҕыллыбыт бааһыналары чөлүгэр түһэрии үлэтэ утумнаахтык ыытыллар, сиртэн үүнээйини ылыыга идэтийэр хаһаайыстыбалар бааһыналарын сыллата кыралаан кэҥэтэн иһэллэр.
-
0
-
0
-
0
-
0
-
0
-
0
