Уопсастыба

Ол туһунан Чурапчы Далбар Хотуна Маарыйа Саабына маннык кэпсээтэ:

– Новосибирскай мин эдэр сааһым куората. 1970-с сыллардаахха полиграфия учуулуксатын бүтэрэн, дойдубар Чурапчыга «Саҥа олох» хаһыат типографиятыгар 40-ча сыл устатыгар үлэлээбитим. Бочуоттаах сынньалаҥҥа тахсаммын, улахан сиэним маннааҕы медицинскэй үнүстүүккэ педиатр быраас үөрэҕэр киирбитигэр, кинини батыһан кэлэн, иккис сылбын кыстаатым. Сахалар элбэхтэр: сорохтор оҕо үөрэттэрэ кэлбиттэр, сорохтор кыбартыыра атыылаһан олохсуйбуттар.

Биир саастыылаахтарбын, ыаллар эбээлэрин кытары билсэммин, кэлэктииптээх курдук сананан үөрэ-көтө сылдьабын. Бэйэбит бассаапка түмсүүлээхпит, холбоон 200-чэкэбит. Салайааччыбыт Өймөкөөнтөн төрүттээх Галина Анисимова араас сынньатар-аралдьытар дьаһаллары тэрийэр, кэмиттэн кэмигэр кэнсиэртэргэ, тыйаатырдарга сырытыннарар. Бэҕэһээ Михайловскай набережнай диэн, Обь өрүс үрдүгэр турар пааркаҕа Доҕордоһуу оһуокайын тэрийдэ.

 Куорат дьаһалтатын бэрэстэбиитэлэ дьахтар кэлэн эҕэрдэлээтэ (хомойуох иһин, аатын-суолун өйдөөн хаалбатахпын):

– Улуу Кыайыы 80 сылын бэлиэтээтибит, Ийэ дойдубутугар уоран саба түспүт хаанымсах өстөөҕү Арассыыйа бары норуоттара биир сомоҕо күүс буоланнар кыайбыттара. Биһиги аҕаларбыт, эһэлэрбит сарын-сарыннарыттан өйөнсөн, бииргэ сэриилэспиттэрэ, кинилэри барыларын сибиряктар диэн ааттыыллара. Биир дойдулаахтар мустан, сайыны көрсө маннык бырааһынньыктыыргыт наһаа үчүгэй, барыгытыгар эйэни, үтүөнү баҕарабын! – диэтэ.

Алгыс сиэрин-туомун артыыс Дмитрий Артемьев толордо. Оһуокай таһаарда, өссө олоҥхоттон быһа тардан толордо. Сахалар национальнай оонньууларын көрөбүт диэн атын омуктар, холобур, алтаецтар бааллара. Биир японка түөтэ хомуска оонньообута.

Онон дьэ, оһуокайдаан, сахалыы ыллаан-туойан, эбэни аһатан, кэлбит ыччаттары, ыалдьыттары сахалыы алаадьынан күндүлээн, салгыҥҥа сылдьан, астынан-дуоһуйан ахан кэллим. Бэйэтэ дьоҕус ыһыах курдук буолла.

Билигин манна күп-күөх, от-мас ситэн ыраатта. Халлаан сылаас,  10-14 кыраадыс.

Хаартыскалары Маарыйа Саабына хааччыйда