Судаарыстыбаннай Дуума Бэрэссэдээтэлэ Вячеслав Володин Аартыкаҕа иитэр-үөрэтэр каадыр 20-30 % тиийбэтин, аны олорор дьиэнэн хааччыллыы таһыма мөлтөҕүн туһунан тоһоҕолоон бэлиэтээтэ.
– Балаһыанньа өссө мөлтөөбөтүн туһугар, хамсатыылаах дьаһаллары ыллахха табыллар. Инньэ гымматахпытына, Аартыкаттан нэһилиэнньэ көһөн барыыта тохтуо суоҕа, оскуолалар уонна балыыһалар суох буоллулар да, бөһүөлэктэр эстиэхтэрэ, -- диэтэ, Хонтуруол кэмитиэтэ бу боппуруоска тустаах эрэгийиэннэр чопчу оройуоннарынан эбии чахчылары түмэригэр сорудахтаата.
Салгыы миниистирдэр болҕомтолорун Аартыкаҕа олорор дьиэнэн хааччыллыыга туһаайда.
-- Хаарбах туруктаах дьиэ Саха Сиригэр 2,4 мөл кв. м, Архангельскай уобаласка 1,8 мөл кв. м, Ханти-Манси аптаныамынай уокуругар 1,5 мөл кв. м, Карелияҕа 1,4 мөл кв. м баар. Тутуу төһө эмит ыытылларын, ипотека баарын үрдүнэн, дьон дьиэҕэ-уокка тииһиниитэ намыһах. Оччотугар үбү, ол иһигэр сороҕор ипэтиэкэҕэ бэриллэр харчыны, хаарбах дьиэлэртэн дьону көһөрүүгэ туһанар ордуга буолаарай? Билигин бааннар бырыһыаннара аһары үрдээн, ипэтиэкэ даҕаны олус ыараата, – диэтэ.
Бэрэсидьиэн Аартыканы сайыннарыыга туруорбут сорудаҕын толорор инниттэн, Бырабыыталыстыба бу хайысханан чопчу быһаарыылары ылара эрэйиллэрин эттэ. Бу туһунан Госуума саайта иһитиннэрэр.
-
0
-
0
-
0
-
0
-
0
-
0
