Сыл ахсын баччаларга кууруссалары аҕалан, нэһилиэнньэҕэ түҥэтии улууска үтүө үгэскэ кубулуйда. Онон ыаллар куурусса комбикуорматын эрдэттэн хааччыналлар уонна кууруссаларга сайаапка түһэрэллэр. Сайыны быһа сибиэһэй сымыыты сииллэр, күһүн кууруссалары сорохтор кыстата хааллараллар, үгүстэр идэһэ оҥостоллор.
Быйыл улууска барыта 1841 кууруса аҕалылынна. Улуус киинин, Хаандыга бөһүөлэгин, олохтоохторо 575 кууруссаны сайаапкалаабыттар. Кууруссалар кэлбит сурахтарын истээт, тута кэлэн, илдьэ бардылар.
Шахтердар олорор Дьабарыкы Хайа бөһүөлэктэригэр 165, табалаах Тополинайга 58, Охотскай Перевозка 73 куурусса тиэрдилиннэ. Ити курдук, кууруссалар Теплай Ключ, Сайдыы, Новай, Мэҥэ Алдан, Кириэс Халдьаайы, Арыы Толоон уонна Ударник олохтоохторугар сайаапка быһыытынан тиэрдилиннэ.
Көтөрдөрү куораттан тиэйэн таһаарарга улахан таһаҕас массыынатын наймыласпыттар. Ардахтан сылтаан суол-иис төһө да мөлтөх буоллар, кууруссалар ыраах айаны бэркэ тулуйбуттар, өссө аара сымыыттаабыттар. Улуус олохтоохторо дьиэ кэргэн экэниэмикэтэ туруктаах буоларын туһугар кыһамньыларын иһин улуус дьаһалтатыгар, тыа хаһаайыстыбатын управлениетын исписэлиистэригэр, суоппар Леонид Тарабукиҥҥа уонна Мурат Неймоховка махталларын тиэрдэллэр.
Хаартыскалары ааптар хааччыйда.
-
2
-
0
-
0
-
0
-
0
-
0
