Бу искибиэргэ саха народнай суруйааччыта Н.Е. Мординов – Амма Аччыгыйын аатынан Харбалаахтааҕы үөрэхтээһин кыһатын бастакы кылааһын үөрэнээччилэрэ (салайааччы К.И. Старостина) уонна Иван Васильевич Николаев аатынан Норуот айымньытын дьиэтин үлэһиттэрэ сыһыарыллан, сылы быһа көрөллөр-истэллэр, ыраастыыллар, сайын сибэккилэргэ уу куталлар.
Искибиэр 2021 сыллаахха Харбалааҕы төрүттээбит Иван Васильевич Николаев төрөөбүтэ 90 сылын бэлиэтээһин чэрчитинэн, бөһүөлэк бастакы тутааччыларын уонна кинилэр оҕолорун көҕүлээһиннэринэн, үбүлээһиннэринэн, норуот күүһүнэн тутуллубута.
Бэс ыйын 5 күнүгэр манна нэһилиэк олохтоохторо сибэкки олордоллоро үтүө үгэскэ кубулуйда. Буору олохтоох дьаһалта хааччыйар, оттон үлэтин бэтэрээннэр сэбиэттэрин бэрэссэдээтэлэ С.П. Винокурова, түмэл үлэһитэ С.А. Васильева сүрүннүүллэр.
Кинилэр оҕолорго Иван Васильевич туһунан кэпсииллэр. Манна даҕатан суруйдахха, Иван Васильевич Николаев 1974 сыллаахха Бүтүн Союзтааҕы айылҕа харыстабылын мэтээлинэн наҕараадаламмыта, ол иһин, бу күн сибэкки олордоллор уонна Харбалаах бастакы тутааччылара ахтыы оҥороллор.
Быйылгы аахсыйаҕа Харбалаах бастакы тутааччыта Алексей Иннокентьевич Уваров кэлэн, оччотооҕу кэми ахтан-санаан ылла, оҕолор болҕомтолоохтук иһиттилэр. Оҕолор сибэкки арааһын олордон, үөрэн-көтөн тарҕастылар. Кинилэр бу үүнээйилэри сайыны быһа көрүөхтэрэ-истиэхтэрэ, уу кутуохтара. Аны күһүн искибиэри көрөр-истэр эстэпиэтэни оскуолаҕа саҥа киирбит маҥнайгы кылаас үөрэнээччилэригэр туттарыахтара.
-
9
-
0
-
0
-
0
-
0
-
0
