Өйдөбүнньүк бэлиэни аһыах иннинэ өрөспүүбүлүкэ дэлэгээссийэтэ Байыаннай албан аат саалатыгар, Сэбиэскэй Сойуус Маршалын Василий Чуйков уҥуоҕар уонна Аччыгый бырааттыы көмүллүүгэ сибэкки дьөрбөтүн уурдулар.
Монумены аһар үөрүүлээх тэрээһиҥҥэ СӨ Ил Дархана Айсен Николаев уонна Волгоградскай уобалас губернаторын солбуйааччы Геннадий Шевцов кыттыыны ыллылар.
Ил Дархан бу Улуу Кыайыы 80 сылыгар аналлаах «Өйдөбүнньүк бастионнара» бырайыак чэрчитинэн арыллыбыт бастакы монумент Арассыыйа норуота бүттүүн ытыктыыр сиригэр, Мамаев булгунньаҕар туруоруллубута ураты суолталааҕын тоһоҕолоон бэлиэтээтэ.
«Биһиэхэ Мамаев кургаҥҥа бастакы өйдөбүнньүк бэлиэ турбута улахан чиэс уонна эппиэтинэс. Бу ньиэмэс басыыһын утары сэриигэ Сэбиэскэй Сойуус бары норуоттарын кытта тэҥҥэ Сталинграды көмүскээбит биһиги биир дойдулаахтарбытыгар дириҥ махталбыт бэлиэтинэн буолар. Манна дойдуну көмүскээбиттэрэ уонна басыыс сэриитин урусхаллаабыттара. Бу сиртэн Аҕа дойду сэриитигэр Улуу Кыайыыны аҕалбыт тосту уларытыылаах хамсааһын саҕаламмыта. Улуу Кыайыы 80 сылын бэлиэтиир үбүлүөйдээх сылга олоххо киллэрэр «Өйдөбүнньүк бастионнара» бырайыакпытын мантан саҕалыырбыт ордук суолталаах. Бу манна сэбиэскэй саллааттар дойдубут уонна бүтүн киһи аймах устуоруйатыгар киирбит туохха да тэҥнэммэт хорсун быһыыны көрдөрбүттэрэ», – диэтэ Ил Дархан уонна Сталинград кыргыһыытыгар кыттыбыт эһэтин Андрей Титович Титаровы ахтан-санаан ааста.
Айсен Николаев Волгоградскай уобалас салалтатыгар уонна эрэгийиэн олохтоохторугар өлбүт саллааттар өйдөбүнньүктэригэр харыстабыллаах сыһыаннарын иһин махталын биллэрдэ.
Волгоградскай уобалас губернаторын солбуйааччы Геннадий Шевцов Улуу Кыайыыга Сталинград кыргыһыытын оруолун санатта уонна саха дьонугар өйдөбүнньүк уопсай дьыалатыгар киллэрэр кылааттарын иһин махтанна.
Иһитиннэрии: СӨ Ил Дарханын уонна Бырабыыталыстыбатын пресс-сулууспата.
Сиһилии: Официальный информационный портал Республики Саха (Якутия)
Хаартыска: Андрей Сорокин.
-
0
-
0
-
0
-
0
-
0
-
0
