Өрөспүүбүлүкэ 14 улууһуттан уонна киин куораттан 40 табаары оҥорооччу (астыыр-таҥастыыр хампаанньалар, бааһынай хаһаайыстыбалар, кэпэрэтииптэр, агрооскуолалар) кытыннылар. Киин куорат олохтоохторо кыстыыр астарын-үөллэрин хааччынныннар диэн быыстапка-дьаарбаҥка биэс күн устата, сарсыарда 10 чаастан киэһэ 19 чааска диэри үлэлээтэ, хас күн ахсын анал бырагырааманан араас култуурунай тэрээһиннэр ыытылыннылар. Тыа хаһаайыстыбатын уонна ас-үөл бэлиитикэтин министиристибэтин чахчытынан, бастакы икки күн устатыгар 31 туонна ас-үөл батарыллыбыта!
Балаҕан ыйын 24 күнүгэр, быыстапка-дьаарбаҥканы арыйыы үөрүүлээх тэрээһинигэр өрөспүүбүлүкэ агробырамыысыланнай комплексын бастыҥ үлэһиттэрин чиэстээһин буолбута. Ол курдук, РФ Тыатын хаһаайыстыбатын министиэристибтин Бочуотунай грамотатынан «Дьокуускайдааҕы үүт собуота» ХЭУо чулуу үлэһиттэрэ: сүрүн мэхээнньик Александр Бобов, инженер-мэхээнньик Константин Ишутин симиэнэ маастара Наталья Малышева, Махтал суругунан «Саха сүөһүтэ» генопуонда тэрилтэтин Таастаахтааҕы салаатын үлэһитэ Андрей Аргунов, «Саха Өрөспүүбүлүкэтин тыатын хаһаайыстыбатын үтүөлээх үлэһитэ» аатынан агроном Прокопий Белолюбскай (Уус Алдан) бэлиэтэммиттэрэ. Судаарыстыбаннай Дуума дьокутаата Юлия Оглобина Махтал суруга ТХНЧИ дьоҕус акадьыамыйатын билимҥэ салайааччыта Людмила Коколоваҕа туттарыллыбыта.
Балаҕан ыйын 27 күнүгэр, Саха Өрөспүүбүлүкэтин Судаарыстыбаннаһын күнүнэн, астыыр салааҕа бастыҥнар, салааларынан куонкурус кыайыылаахтара быһаарылыннылар. Ол курдук, «Сир аһыттан бастыҥ бородууксуйа (барыанньа, джем)» номинацияҕа I истиэпэннээх дипломунан «Тирэх ТХПК (бэрэссэдээтэл Антонида Барашкова, Сунтаар), «Сир аһыттан бастыҥ бородууксуйа (сироп)» номинацияҕа I истиэпэннээх дипломунан «Чурапчы ТХПК (бэрэссэдээтэл Николай Петров), мүөккэ I истиэпэннээх дипломунан Күннэй Тимофеева биирдэм тэрилтэтэ (Чурапчы), «Үрдүк хаачыстыбалаах ыыһаммыт балык» уонна «Үрдүк хаачыстыбалаах туустаах балык» номинацияларга I истиэпэннээх дипломнарын «Ас-рыба» ХЭУо (Артем Васильев, Дьокуускай), «Балык ас саҥа көрүҥэ» номинацияҕа «Тулагытааҕы агрооскуола» ТХПК (Михаил Петров), «Үрдүк хаачыстабалаах сымыыт» номинацияҕа I истиэпэннээх дипломунан «Дьокуускайдааҕы көтөрү иитэр баабырыка» АУо (гендириэктэр Наталья Дягилева), «Бастыҥ килиэп» номинацияҕа I истиэпэннээх дипломунан «Дьокуускайдааҕы килиэп кэмбинээтэ» АУо (гендириэктэр Светлана Кынакытова), «Бастыҥ кондитерскай оҥоһук» номинацияҕа I истиэпэннээх дипломунан «Чурапчы» ТХПК (бэрэссэдээтэл Николай Петров), «Килиэп саҥа көрүҥэ» номинацияҕа «Дьокуускайдааҕы килиэп кэмбинээтэ» АУо (гендириэктэр Светлана Кынакытова) бэлиэтэннилэр.
Сиртэн үүнээйини ылыы, сүөһүнү иитии уо.д.а. салааларга бастыҥнар бүгүн, өрөспүүбүлүкэтээҕи «Ас-үөл» быыстапка-дьаарбаҥканы түмүктүүр тэрээһиҥҥэ быһаарыллыахтара, чиэстэниэхтэрэ.
Хаартыска: Анна Сергучева түһэриитэ.
-
5
-
0
-
0
-
0
-
0
-
0
