Уопсастыба

Өрөспүүбүлүкэтээҕи быыстапка-дьаарбаҥка быйыл Улуу Кыайыы 80 сылын, саха судаарыстыбаннай-бэлитиичэскэй диэйэтэлэ, бырантабыык Гаврил Чиряев төрөөбүтэ 100 сылын уонна Уһук Илиҥҥи федеральнай уокурук төрүттэммитэ 25 сылын бэлиэтээһин чэрчитинэн тэрилиннэ.    
Биэс күн устата ыытыллыбыт бу дьоһун дьаһалга 14 улуустан уонна киин куораттан түмсүбүт кэлбит астыыр-таҥастыыр хампаанньалар, бааһынай хаһаайыстыбалар, тыа хаһаайыстыбатын кэпэрэтииптэрэ уонна 15 агрооскуола бэйэлэрэ оҥорон таһаарбыт бородууксуйаларын быыстапкалаан көрдөрдүлэр, нэһилиэнньэҕэ батардылар. Оттон куорат олохтоохторо кыстыыр астарын-үөллэрин хааччыннылар.    

Эспиэрдэр хамыыһыйалара үлэлээн, көрүҥнэринэн бастыҥнары быһаарда. Судаарыстыбаннас күнүгэр сир аһын, балыгы астааһыҥҥа бастыҥнар бэлиэтэммиттэрэ, оттон бэҕэһээ атын салаалар кыайыылаахтара чиэстэннилэр. Бириистэри дохсун ытыс тыаһын ортотугар тыа хаһаайыстыбатын уонна ас-үөл бэлитикэтин министирин солбуйааччылар Анна Стручкова уонна Прокопий Николаев туттардылар. Быыстапка-дьаарбаҥка муҥутуур кыайыылааҕынан, Гран-при хаһаайынынан, «Дьокуускайдааҕы килиэп кэмбинээтэ» аахсыйалаах уопсастыба буолла, «Бастыҥ астыыр тэрилтэ» диэн көһө сылдьар былааҕы тутта! Быйыл тэриллибитэ 85 сылын бэлиэтээбит хампаанньа генеральнай дириэктэр Светлана Кынакытова салалтатынан таһаарыылаахтык үлэлиир, килиэп-буулка уонна кондитерскай аһылык 180 көрүҥүн астаан батарар. Эргиэн-логистика кииннэрин кытары көдьүстээхтик үлэлиир бырайыагы тобулан, хотугу улуустары кытары хааччыйар.

Халбаһыыны оҥорууга Алексей Герасимов биирдэм тэрилтэтэ (Дьокуускай), ыраас ууга Василий Игнатьев биирдэм тэрилтэтэ (Дьокуускай), арыыга «Илгэ» кэпэрэтиип (салайааччы Анатолий Кузьмин, Томпо улууһа), чөчөгөйгө «Чурапчы» кэпэрэтиип (салайааччы Николай Петров, Чурапчы), сыырга «Дьокуускайдааҕы үүт собуота» аахсыйалаах уопсастыба, эттэн аска «Томтор» кэпэрэтиип (Уус Алдан улууһа), бурдукка «Амматааҕы» аахсыйалаах уопсастыба (салайааччы Роман Спасьев), көтөр этигэр «Дьокуускайдааҕы көтөр баабырыката» аахсыйалаах уопсастыба (генеральнай дириэктэр Наталья Дягилева) бастыҥынан ааттаннылар. «Дьокуускайдааҕы үүт собуота» аахсыйалаах уопсастыба астаабыт битэмииннээх оҕо үүтэ саҥа бородууксуйа быһыытынан үрдүктүк сыаналанна.

Бастыҥынан дьоҕус тэрилтэлэргэ -- «Илгэ» кэпэрэтиип (Томпо улууһа), орто тэрилтэлэргэ -- «Чурапчы» кэпэрэтиип, бөдөҥ хампаанньаларга -- «Дьокуускайдааҕы килиэп кэмбинээтэ» аахсыйалаах уопсастыба билинилиннилэр.
Биирдэм урбаанньыт Василий Игнатьев (Дьокуускай), «Сыа Бүлүү» кэпэрэтиип уонна «Дьокуускайдааҕы үүт собуота» аахсыйалаах уопсастыба уо.д.а. куонкурус хас да көрүҥэр лауреат аатын ылбыттара кинилэр хаһаайыстыбалара бөҕө туруктааҕын, оҥорон таһаарар бородууксуйаларын хаачыстыбата үрдүгүн кэрэһилээтэ. 

«Агростартап» гранын быйылгы куонкуруһун кыайыылаахтарыгар, 15 киһиэхэ, сибидиэтэлистибэ туттарылынна. Кинилэр дьэ бу үпкэ тирэҕирэн, пиэрмэр хаһаайыстыбатын тэрийиэхтэрэ.
-- «Ас-үөл -- 2025» быыстапка-дьаарбаҥка бэрт тэрээһиннээхтик ыытылынна, сыалын-соругун ситтэ. Өрөспүүбүлүкэ агробырамыысыланнай комплекса олоҕу кытары тэҥҥэ хаамсан сайдарын, үрдүк хаачыстыбалаах, экология өттүнэн ыраас, баай иҥэмтиэлээх бородууксуйа оҥоһуллан, аһылык өттүнэн куттал суох буолуута хааччылларын өссө төгүл көрдөрдө, -- диэн эспиэрдэр уонна быыстапка-дьаарбаҥы тэрийээччилэр сыаналаатылар.

Хаартыскаҕа  Тыа хаһаайыстыбатын уонна ас-үөл бэлиитикэтин пресс-сулууспатын салайааччы Анна Стручкова түһэриитэ.