ВИЖ тыа хаһаайыстыбатын сүөһүтүн селекциятыгар, генетикатыгар уонна биотехнологиятыгар сүрүн чинчийэр киин буолар. Саха сириттэн манна 1980-1990 сс. СГУ тыа хаһаайыстыбатын бакылтыатын, Тыа хаһаайыстыбатын үнүстүүтүн бүтэрбит эдэр дьоннор үөрэнэн, диссертацияларын ситиһиилээхтик көмүскээн, билим хандьыдаата буолан кэлэн, ситиһиилээхтик үлэлээбиттэрэ, үлэлии да сылдьаллар. Тыа хаһаайыстыбатын уонна ас-үөл бэлиитикэтин министиэристибэтэ сүөһүнү иитиигэ уонна геномнай силиэксийэҕэ үрдүк кылаастаах исписэлиистэри бэлэмнииргэ олохтоохтук ылсан, 30 сыллаах тохтобул кэнниттэн үнүстүүтү кытары бииргэ үлэлээһини сөргүтэн, АГАТУ-ну туйгуннук бүтэрбит эдэр исписэлииһи аспирантураҕа ыытта.
– Чахчы кэскиллээх дьыаланы саҕалаабытын иһин, Тыа хаһаайыстыбатын уонна ас-үөл бэлиитикэтин министиэристибэтигэр, чуолаан миниистир Артем Александровка аҕа көлүөнэ исписэлиистэр ааттарыттан махталбын тиэрдэбин. Билигин, дойдуга араас култуурунай (киһи бэйэтэ үөскэппит) боруодалара тэнийэн аҕай турар кэмигэр, бэйэбит төрүт сахабыт сүөһүтүн-сылгытын итиэннэ олохсутуллубут симменталь уонна холмогор боруода сүөһүбүтүн сайыннарарга үрдүк кылаастаах исписэлиистэр олус наадалар. Онон, ВИЖ аспирантуратын кытары бииргэ үлэлээһин сөргүтүллүбүтүн саха селекционер-зоотехниктара, учуонайдара уонна сүөсүһүттэр ситиһэн кэлбит үлэлэрин салгыы сайыннарыыга саҥа сүүрэн киирбитин быһыытынан сыаналыыбыт, астынабыт, – диир Саха Өрөспүүбүлүкэтин үтүөлээх зоотехнига Мария Никанорова.
Быйыл сайын Москубаҕа, тыа хаһаайыстыбатын анал үрдүк үөрэҕин кыһыл дипломунан бүтэрбиттэр Бүтүн Арассыыйатааҕы баалларыгар АГАТУ-ттан алта оҕо кыттан, дойду араас эрэгийиэннэриттэн кэлбит биир саастыылаахтарын, биир идэлээхтэрин кытары билсэн-көрсөн, элбэх саҥа идьиэйэлэринэн иитиллэн, талан ылбыт идэлэринэн айымньылаахтык үлэлиир-хамсыыр санаанан кынаттанан кэлбиттэрин туһунан биһиги хаһыаппыт суруйан турар. Ол баалга кыттыбыт алта оҕоттон биирдэстэрэ – Виктория Шамаева. Эдэр киһиэхэ аҕа саастаах биир идэлээхтэриҥ эрэллэрин түһэн биэримэ, АГАТУ-га туйгуннук үөрэммит тэтимҥин ыһыктыбакка, дойду бөдөҥ үөрэҕин кыһатын аспирантуратын ситиһиилээхтик бүтэрэн кэлэҥҥин, кинилэр үлэлэрин салҕаа диэн алгыыбыт.
Хаартыска: Тыа хаһаайыстыбатын уонна ас-үөл бэлиитикэтин министиэристибэтин саайта.
-
1
-
0
-
0
-
0
-
0
-
0
