Уопсастыба

Бастакы ыал күн күбэй ийэтэ, эйэҕэс эбээтэ Элгээйи нэһилиэгин бочуоттаах олохтооҕо, иитэр-үөрэтэр үлэ бэтэрээнэ, Саха Өрөспүүбүлүкэтин үөрэҕириитин туйгуна, Учууталлар учууталлара Евдокия Ивановна, ыал аҕа баһылыга Элгээйи нэһилиэгин бочуоттаах олохтооҕо, 40-тан тахса сыл Ленин уордьаннаах «Элгээйи» сопхуос чөмпүйүөн тырахтарыыһа, мэхэньисээтэрэ, тыа хаһаайыстыбатын бэтэрээнэ Иван Муксунович Кимнэр дьэ кэргэттэрэ.
Иккис ыал – Элгээйи нэһилиэгин биир көхтөөх, үлэһит ыала, бэйэлэрин үтүө холобурдарынан бары тэрээһиннэргэ, нэһилиэк, улуус уопсастыбаннай, култуурунай-спортивнай хамсааһынын биир бастыҥ көҕүлээччилэрэ. Иэримэ дьиэ Иэйиэхситэ Маргарита Федоровна өрөспүүбүлүкэҕэ бастакынан Ийэ-оҕо киинин Элгээйигэ тэрийбитэ, дьахтар сэбиэтин бэрэссэдээтэлинэн, «Ёлочка» уһуйаан сэбиэдиссэйинэн үлэлээбитэ, «Көмүс саас» диэн саастаах дьон түмсүүтүн салайбыта. Дьиэ кэргэн аҕа баһылыга, тулхадыйбат тулааһына, суон дурдата, халыҥ хаххата Юрий Муксунович Ким сүрдээх уустук, улахан эппиэтинэһи эрэйэр Элгээйитээҕи РЭС тэрилтэтигэр электромонтердаабыта. Аҕатын дьарыгын утумнаан, уйгу олох төрүөтэ араас эгэлгэ үүнээйини олордон, үлэннэн дуоһуйар, кэнчээри ыччаты уһуйар дьиэ кэргэн бас-көс киһитэ.

Бу күн үйэ аҥаара бииргэ олорбут дьиэ кэргэттэрбитин улуус «Кыһыл көмүс» кинигэтигэр киирэр бэлиэ түгэни Саха Өрөспүүбүлүкэтин Бырабыыталыстыбатын иһинэн Гражданскай турук аакталарын суруйар управление (ЗАГС) Сунтаар улууһунааҕы салаатын салайааччыта Анна Григорьева салайан ыытта. Сунтаар улууһун баһылыгын социальнай боппуруостарыгар солбуйааччы Мирослав Иванов улуус баһылыгын эҕэрдэ суругун, өйдөбүнньүк бэлиэни, бэлэхтэри туттарда. Нэһилиэк баһылыга Аркадий Самойлов нэһилиэкпит киэҥ туттар мааны дьиэ кэргэттэрин эҕэрдэлээтэ, мэлдьи сүбэ-соргу буолалларыгар махталын биллэрдэ.
Биир көрүүттэн өйдөһөр, биир салгынынан тыынар Маргарита, Юрий Кимнэр «Дьол вальса» үҥкүүлэрин көрөн дьон-сэргэ сүргэлэрэ көтөҕүлүннэ, дохсун ытыс тыаһа ньиргийдэ.

Аныгы сайдыылаах үйэҕэ олорор дьон буолан дойду араас муннуктарыттан, куйаар ситимин нөҥүө күндү дьоннорун үөрүүлэрин үллэстэн оҕолоро, сиэннэрэ, хос сиэннэрэ, аймах-билэ дьонноро ыыппыт эйэҕэс эҕэрдэлэрэ, анаабыт алгыс тыллара, ыра санаалара күөх экран нөҥүө күндү бэлэх буолан кутулуннулар. Бииргэ үөрэммит, үлэлээбит доҕотторо, алтыспыт дьонноро эҕэрдэлээтилэр, сэмэй бэлэхтэрин туттардылар.
Онтон «Кыһыл көмүс дьиэ кэргэттэрбит» маҥнайгы маанылаах сандалыларыгар бар дьоннорун ыҥыран, минньигэс аһынан күндүлээтилэр.
Дьэ, бу курдук дьиэ кэргэн туохха да тэҥнэммэт, сатаан сыаналаммат, сүрэххэ саамай ытык өйдөбүл буолар. Дьиэ кэргэн чахчы да бары өттүнэн таптаһан, өйдөһөн, бигэ туруктаах буоллаҕына, норуот сайдар кэскиллээх!

Хаартыскалары Марта Николаева ыытта.