Ол иһин, өрөспүүбүлүкэ парламена 2025 сыллаахха, бэс ыйыгар Арассыыйа Федерациятын Бырабыыталыстыбатын Бэрэссэдээтэлэ Михаил Мишустиҥҥа ыыппыт суругар таакса биһиги эрэгийиэммит уратытын төрүт учуоттаабатын уонна Уһук Хотугу дойду олохтоохторугар улахан ноҕурууска буолбутун ыйбыта. Онон, биир муксуун тааксатын 70 083 солкуобайтан 3 640 солкуобайга, биир хатыыс тааксатын 160 456 солкуобайтан 20 822 солкуобайга түһэрэргэ этии киллэрбитэ. Быһаарыыга муксуун тааксата 2023 сыллаахха Обь-Иртыш бассейыныгар балык быстар аҕайааһыныттан сылтаан үрдэтиллибит буоллаҕына, Саха Сирин өрүстэригэр бу балык саппааһа балачча баайа уонна хотугу дойду олохтоохторун төрүт астара буолара этиллибитэ. Оттон Өлүөнэ өрүскэ үөскүүр хатыыһы анал учаастактарга бултуур көҥүллэнэрин быһыытынан, «Кыһыл кинигэҕэ» киллэриллибит айылҕа ресурсаларыгар туттуллар тарыып барсыбата ыйыллыбыта.
Бу сурукка хардаран, Арассыыйа Федерациятын Тыатын хаһаайыстыбатын министиэристибэтэ дойду киин эрэгийиэннэригэр хатыыһы көҥүлэ суох бултааһын наһаа элбээбитин иһин, билиҥҥи кэмҥэ итинник чэпчэтиини ылынар эрдэ диэн хоруйдаабыта. Ол эрээри, Федерация Сэбиэтэ Аграрнай бэлиитикэҕэ уонна айылҕаны туһаныыга кэмитиэккэ итиэннэ Тыа хаһаайыстыбатын министиэристибэтигэр эрэгийиэннэр уратыларын көрөн, тааксаны намтатыы боппуруоһун үөрэтэргэ сорудахтаабыта. Ааспыт күһүн, алтынньыга, ыытыллыбыт дьүүллэһии түмүгүнэн, Федерация Сэбиэтин аграрнай бэлиитикэҕэ уонна айылҕаны туһаныыга кэмитиэтин бэрэссэдээтэлэ Александр Двойных Тыа хаһаайыстыбатын министиэристибэтэ уонна Балыктааһыҥҥа федеральнай ааҕыныстыба (Росрыболовство) эрэгийиэннэр этиилэрин ырытан оҥороллоругар сорудах биэрбитэ. Ити эрээри, балык бу икки көрүҥҥэр тааксаны намтатар туһунан Саха Өрөспүүбүлүкэтэ эрэ кимиилээхтик туруорсар, оттон муоралаах эрэгийиэннэр (Камчатка, Приморье, Астрахань уобалаһа) эппиэтинэһи күүһүрдэргэ модьуйар эбиттэр.
Федеральнай биэдэмистибэлэр Арассыыйа Федерациятын Бырабыыталыстыбатын 1321 №-дээх Уурааҕар уларытыылары киллэриигэ үлэлэрин саҕалаабыттар. Бу докумуон эрэгийиэннэр уратыларын учуоттаан оҥоһуллуо итиэннэ биир өттүттэн, борохоньуордар көҥүлэ суох балыктыылларын бохсуо, иккис өттүттэн, Хоту дойду олохтоохторун социальнай-экэнэмиичэскэй уратыларын учуоттуоҕа. Биһиги бу боппуруоһу кытаанах хонтуруолга тутабыт, тулалыыр эйгэ уонна айылҕа ресурсаларын нуормалара төрүт олохтоох нэһилиэнньэ олоҕор-дьаһаҕар охсууну оҥорботун туһугар туруулаһабыт, – диир Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Андрей Находкин. Бу туһунан Ил Түмэн пресс-киинэ суруйар.
Хаартыска: Ил Түмэн саайта.
-
1
-
0
-
0
-
0
-
0
-
0
