-Биһиги сис кэмитиэппит нөҥүө ааспыт сылга ыччат бэлиитикэтигэр, физичэскэй култуураҕа, успуорт национальнай көрүҥнэригэр уларытыылары киллэрэргэ сэттэ сокуону тиһэх ааҕыыга ылынныбыт.
Ыччаты Аҕа дойдуга бэриниилээх буолуу тыыныгар иитэргэ сокуону тупсарарга Судаарыстыбаннай Дуума ыччат бэлиитикэтигэр сис кэмитиэтин бэрэссэдээтэлин Артем Метелевы кытта көрүстүбүт. Өрөспүүбүлүкэҕэ успуорт национальнай көрүҥүн сайыннарарга Судаарыстыбаннай Дуума физичэскэй култуураҕа уонна успуорка сис кэмитиэтин бэрэссэдээтэлин Олег Матицыны кытта оробуочай көрсүһүүгэ кэпсэттибит. Кини Дьокуускайга сэтинньигэ кэлэ сылдьан оҕолору успуорка утумнаахтык уһуйарга мунньах тэрийэн ыыппыта. Судаарыстыбаннай Дууманы кытта үлэбит хайысхатынан, успуорду сайыннарыыга өрүү бииргэ үлэлэһэбит.
Былырыын биһиги сис кэмитиэппит Ил Түмэҥҥэ уопсайа 11 мунньаҕы, 4 төгүрүк остуолу тэрийэн ыытта. Онно трансплант-успуорт кыһалҕаларын, сайдар кэскиллэрин ырытыстыбыт. Трансплант-успуорт диэн сүрэхтэрин, быардарын, бүөрдэрин атын киһи уорганыгар уларыттарбыт, уустук эпэрээссийэни ааспыт дьон олоххо тардыһыыларын күүһүрдэр сыалтан ыытыллар. Ону таһынан, ГТО тула, ыччат бэлиитикэтигэр олохтоох бэйэни салайыныы уорганнарын өйөөһүн, оҕо, эдэр ыччат ортотугар успуорду сайыннарыы стратегиятын, инники кэскилин дьүүллэстибит.
Эһиил 2027 с. Ньурбаҕа Саха өрөспүүбүлүкэтин норуоттарын IX спортивнай оонньуулара буолуохтаах, бу бэлиэ түгэҥҥэ чэпчэки атлетикаҕа сылаас манежтаах стадион, харбыыр бассейннаах физкултуурунай-чэбдигирдэр киин тутуллуохтаах. Бэдирээччит «Сэттэ» хампаанньа, тутуу үлэтэ кыраапык быһыытынан баран иһэр. 3000 миэстэлээх трибунаҕа, хонтуруоллуур, пропуһу бэрэбиэркэлиир пууҥҥа күн бүгүн сыбаайатын түһэрдилэр, информационнай таблону оҥордулар. Манеж тимир каркааһын таҥыы 90% бүттэ. Физкултуурунай-чэбдигирдэр киин цокольнай бүрүөһүнүн оҥоро сылдьаллар.
Ону таһынан, Антоновкаҕа 20 миэстэлээх интэринээттээх, илиҥҥи охсуһуу саалатын тутуохтаахтар. Чаппандаҕа, Сүлэҕэ модульнай успуорт саалата таҥыллыахтаах.
Саха өрөспүүбүлүкэтин норуоттарын IX спортивнай оонньууларыгар улуустартан 6,2 тыһыынча киһи кыттара күүтүллэр. Кинилэр үөрэх кыһаларын эбийиэктэригэр түһүөхтэрэ. Күрэхтэһиилэр Ньурбаҕа, аттынааҕы нэһилиэктэргэ Антоновкаҕа, Сүлэҕэ, Чаппандаҕа, Күндээдэҕэ, Ньурбачааҥҥа буолуохтара. Бырагыраамаҕа успуорт 15 көрүҥэ киирдэ. Түмүктүүр биэтэк 2027 с. от ыйын 7-11 күннэригэр ыытыллыаҕа.
Хаартыска: Ил Түмэн ыччакка, физичэскэй култуураҕа уонна успуорка сис кэмитиэтин архыыбыттан.
-
0
-
0
-
0
-
0
-
0
-
0
