Орто Халыма улууһунааҕы тыа хаһаайыстыбатын департаменын салайааччыны солбуйааччы Мария Шарина маннык кэпсиир:
– Биһиги улууска 729 ынах сүөһү, ол иһигэр 341 ыанар ынах итиэннэ 2 288 сылгы, ол иһигэр 1 202 биэ баар. Хаар халыҥ буолан, дьэ, сылгыга ыарахан, сылгыһыттарга улахан эппиэттээх кыстык буолла. Сылгыһыттар үөрдэри кэрийэ сылдьан көрөн-истэн, мөлтүөх туруктаахтары солбуһуннара сылдьан эбии аһаталлар. Күн бүгүн 200 сылгы эбии аһылыкка турар. Билиҥҥитэ сүтүк тахсыбыта, сылгы охтубута биллибэт. Кырыымчык оттоох ыалларга саппаас от пуондатыттан тыыран көмө оҥоһуллубута, билиҥҥи туругунан 2 000 туонна оттоохпут, кыстыгы туоратар ини диэн эрэнэбит. Дьокуускайтан 39 туонна комбикуорманы уонна эбиэһи аҕалан, нэһилиэктэринэн тиэрдэ сылдьабыт. Биһиги курдук ыраах дойдуга тиэйэр-таһар үлэ ороскуота олус улахан, улууспут баһылыга Иван Лаптев дьаһалынан, улуус бүддьүөтүттэн харчы көрүллэн, тыын ыллыбыт.
Хаартыскаҕа: 1. Кыстык туругун билсиһии. Хаҥастан уҥа: култуура управлениетын салайааччы Анастасия Павлюк, «Өлөөкө Күөл» сылгы собуотун дириэктэрин солбуйааччы Иван Винокуров, улуус баһылыга Иван Лаптев, тыа хаһаайыстыатын управлениетын начаалынньыгын солбуйааччы Мария Шарина.
2. «Өлөөкө Күөл» сылгы собуотун сүөһү иитэр комплекса сылаас.
Хаартыскалары Мария Шарина ыытта.
-
0
-
0
-
0
-
0
-
0
-
0
