"СӨ Бырабыыталыстыбатын кытта тэҥҥэ сааскы халаан, ойуур баһаарын уонна айылҕа баайын хостооччулар үлэлэрин сезоннара саҕаланан түбүкпүт элбэх. Күннэтэ көрсүһүүлэр, кэмитиэт мунньахтара, төгүрүк остуоллар ыытыллаллар. «Сир баайын эппиэтинэстээхтик туһаныы туһунан» сокуон 2018 с. ылыныллыбыта. Бу Арассыыйа эрэгийиэннэригэр суох сокуон. 89 эрэгийиэн баарыттан кинилэр уратыларын учуоттаан оҥоһуллубут соҕотох сокуон. Бу соторутааҕыта Хакасияттан дэлэгээссийэ кэлэн барбыта, сир баайын хостооччуларбытын кытта бииргэ үлэлээһиҥҥэ маннык сокуон наада эбит диэн көрөн-истэн бардылар", - диэн билиһиннэрдэ Андрей Находкин.
Кини сокуон, бастатан туран, саамай сүрүн сыала-соруга Саха Сиригэр үлэлии киирбит хампаанньалар эппиэтинэстээх буолуохтаахтарын хааччыйар диэн быһаарда. Сир баайын хостооччулар бэйэлэрин эрэ иннилэрин көрүммэккэ улуустарбытыгар, нэһилиэктэрбитигэр олорор дьон иннигэр эппиэтинэһи сүгүөхтээхтэр. Ону аата даҕаны этэр, сир баайын хостооччулар олохтоох былааһы, нэһилиэнньэни, аҕыйах ахсааннаах норуоттар общиналарын кытта бииргэ үлэлэһиэхтээхтэр. Бырабыыталыстыба таһымыгар «Олохтоох каадырдар — бырамыысыланнаска» диэн улахан бырагыраама баар, сыл аайы олохтоох дьону хамнастаах үлэҕэ ылаллар.
Сокуон төрдө-төбөтө өрөспүүбүлүкэ таһымыгар баар хампаанньалар эппиэтинэстээх буоллалларын үөскэтэр. Манна Ил Түмэн экэниэмикэҕэ, инвестиционнай уонна бырамыысыланнай бэлиитикэҕэ, бүддьүөккэ, үпкэ-харчыга, түһээн уонна сыана бэлиитикэтигэр, бас билии уонна приватизация боппуруостарыгар сис кэмитиэт үлэлэһэр. Сир баайын хостооһун сүнньүнэн хоту ыытылларын быһыытынан, аҕыйах ахсааннаах хотугу норуоттар боппуруостарыгар уонна Аартыка дьыалаларыгар сис кэмитиэт эмиэ киирсэр.
"Мин салайар кэмитиэтим айылҕаны харыстааһыны хонтуруоллуур, онон СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэни, СӨ Бырамыысыланнаска уонна геологияҕа министиэристибэтин, хонтуруоллуур уорганнары «Росприроднадзор», Айылҕаны харыстыыр борокуратуураны, улуус аайы инспектордары кытта үлэлэһэбит. Өрөспүүбүлүкэ иһигэр ылыныллыбыт сокуон үлэтин кинилэр хонтуруоллууллар", - диэтэ Андрей Михайлович.
Биэрии кэмигэр хас да истээччи эрийэн тиийэн, долгуйар ыйытыктарын биэрдилэр. «Бүлүү улууһа куораты, өрөспүүбүлүкэни барытын гааһынан хааччыйан олорор. Өрүс уҥуор Хаҕыр, Балаҕаччы, Кыргыдай, II Күүлэт «ЯТЭК» Орто Түҥнээҕи гаастаах сириттэн субу чугас сытабыт эрээри, гааһа суох олоробут. Бу куруук туруорсар кыһалҕабыт, өрөспүүбүлүкэ отчуотугар СӨ Инновацияҕа, сыыппара сайдыытыгар уонна инфокоммуникационнай технологияҕа миниистир Петр Николаев кэлэ сылдьан ону истэн олус сөхпүтэ. Урут кирэдьиит диэн эрэннэрбиттэрэ, онтон сааҥсыйа мэһэйдээбитэ, гааспыт Өлүөнэ эбэни туораан, Чурапчыга тиийдэ, оттон Бүлүү улууһун нэһилиэктэригэр баччааҥҥа диэри суох. Гааспытын турба устун атын улуустарга ыыталларын көрөн баран мэлийэн олоробут», — диэн Бүлүүттэн Николай Николаев баар кыһалҕаны эттэ.
Онуоха Андрей Находкин Бүлүү өрүс уҥуор олорор нэһилиэктэргэ гаас суох, нэһилиэнньэ ону күүскэ туруорсарын билэбит диэн хардарда. "Бүлүү улууһуттан Ил Түмэҥҥэ мандааттаах дьокутааттар бааллар, кинилэр улуус баһылыгын кытта күүстэрин холбоон, быһаарар кэмнэрэ кэллэ. Күн бүгүн түөрт нэһилиэккэ баччаҕа гаас турбата киириэ диэн эрэннэрэр кыаҕым суох. Гаас турбата аттыларынан атын сиргэ ааһара бу уустук боппуруос. Мин санаабар, улуус баһылыгыттан бу улахан тутулуктаах", - диэн эппиэттээтэ.
Эбэн эттэххэ, Саха Сирин гааһынан хааччыйан олорор Бүлүү улууһун кытта ыаллаһа сытар Үөһээ Бүлүү, Ньурба, Сунтаар нэһилиэктэригэр гаас турбата баччааҥҥа диэри тардылла илик, ол эрэн илин эҥэр улуустарыгар гаас ситимэ тиийдэ.
Хаартыска СИА, Мария Васильева.
-
0
-
0
-
0
-
0
-
0
-
0
