Уопсастыба

Гаврил Алексеев Аартыка улуустарыгар куораттан сыана өссө ыараханын, дьон 28000 солк. биэнсийэлээҕин учуоттаан туран, социальнай хантыраагы кэҥэтиэххэ, хоту дойду олохтоохторугар туһунан оҥоруохха сөп дуо? — диэн туоһуласта.

Георгий Степанов социальнай хантыраак географическай балаһыанньанан буолбакка, ким туохха туттарынан оҥоһуллубутун бэлиэтээтэ. Социальнай хантыраагынан урбааны, кэтэх хаһаайыстыбаны арыйарга 500 тыһ. солк. көрөллөрүн иһитиннэрдэ. Ону таһынан, олох уустуктарын туоруурга көмө оҥоһуллар. Социальнай хантыраак сүрүн сыала-соруга дьону бэлэм харчыга үөрэппэккэ, үлэҕэ уһуйуохтаах.

Иван Луцкан күн бүгүн үрдүк үөрэхтээх юристар, экэнэмиистэр дьиэ сууйааччы саҕа хамнастаахтарыттан элбэх киһи хараастарын, дьокутааты кытта көрсүһүүгэ бу кыһалҕаны үгүстүк туруорсалларын эттэ. Үрдүк үөрэхтээх, идэтин баһылаабыт киһи уонна үөрэҕэ суох боростуой дьиэ сууйааччы хамнаһын араарарга бырабыыталыстыба туох миэрэни ыларын ыйыталаста.

Хамнас алын кээмэйэ сыл ахсын үрдээн, кэнники үс сыл иһигэр биллэрдик эбиллэн, Дьокуускайга быйыл 67 733 солк., Аартыка улуустарыгар 75 861 солк. тиийдэ. Ол иһин судаарыстыбаннай тэрилтэҕэ үлэлиир дьон хамнаһын хамнас алын кээмэйигэр диэри үрдэтэн биэрэллэр. 117 000 бүддьүөт үлэһиттэриттэн 56 000-та ыам ыйынааҕы ыйаахха киирбэтэх дьон, кинилэр быраас, учуутал, култуура үлэһитэ буолбатахтар, ол иһин кыра хамнастаахтар.

Холобур, Мэдиссиинэ киинин тиэхиньиичэскэй өттүн хааччыйар инженер 67 000 солк. ылар, кини санитаркаттан, алын сүһүөх мэдиссиинэ үлэһититтэн даҕаны кыра хамнастаах.

Георгий Степанов этэринэн, хамнаһы объективнай дифференциациялааһын (дьон үөрэҕинэн, таһымынан, оҥорор үлэтинэн көрөн хамнаһы тыырыы) бырабыыталыстыба уонна Ил Түмэн бэбиэскэтигэр баар. Ол эрэн кэнники икки сыл иһигэр ыйаахха киирбэтэх үлэһиттэр хамнастарын үрдэппэтэхтэр.

Ол иһин үрдүк үөрэхтээх дьон хамнаһа дьиэни сууйааччы хамнаһыттан хаалан хаалбыт. Кинилэр хамнастарын үрдэтии 2026 с. бүддьүөккэ киирбэтэх, ол эрэн федеральнай таһымҥа үлэ ыытыллар диэн бэлиэтиир Георгий Степанов. Ыам ыйынааҕы ыйаахха киирбэтэх «атыттар» дэнэр бүддьүөт үлэһиттэрин хамнаһын 20,7% үрдэтэргэ 3-3,5 млрд. солк. ирдэнэр. Быыһык кэмҥэ бүддьүөккэ итиччэ үп суоҕунан эмиэ биллибэт болдьоххо уһатылларыгар тиийэр. Муниципальнай сулууспалаахтар манна эмиэ киирэллэр, кинилэр хамнастарын үрдэтэргэ Ил Дархан Айсен Николаев Анал этиитигэр эппитэ.

Ааптар хаартыскаҕа түһэриитэ.