Тыа сирин, олохтоох оҥорон таһаарыыны, кэрэ айылҕалаах сиргэ туризмы сайыннарыы судаарыстыбаннай бэлиитикэ сүрүн хайысхата буоларын быһыытынан, үлэ миэстэтин таһаарарга, нэһилиэнньэни олохсутарга үлэ ыытылларын туһунан хардардылар.
Норуот дьокутаата Сергей Сивцев Аартыка улуустарыгар дьон дьадайыыга үктэнэр кутталлааҕын, нэһилиэнньэ хоту төһө харчыны ороскуоттуурун учуоттуурга ыҥырда.
СӨ Бырабыыталыстыбатын бэрэссэдээтэлин бастакы солбуйааччы Георгий Степанов тиийинэн олоруу кээмэйиттэн кыра дохуоттаах дьоҥҥо көмө оҥоһулларын, ол эрэн хоту улуустарга бу ньыма ас-таҥас сыанатын толору хаппат буолан, итини ааҕыы бэрээдэгин тупсарар наадалааҕын билиннэ.
Ил Түмэн үөрэххэ уонна билимҥэ сис кэмитиэтин бэрэссэдээтэлэ Антонина Григорьева өрөспүүбүлүкэ дьадаҥы киһи ахсаанынан Арассыыйаҕа 11 миэстэҕэ турарын бэлиэтээтэ. Статистика этэринэн, куоракка хас бэһис киһи дьадайыы боруогар үктэммит, оттон тыа сиригэр 17-ис киһи итиннэ хапсар. Саамай уйан доруобуйаларынан хааччахтаах, биэнсийэлээх, элбэх оҕолоох ыал, кинилэри тиһигин быспакка өйүүр наадалааҕын тириэртэ дьокутаат. 12300 сэрии оҕолоруттан үксэ инбэлииттэр, кинилэргэ көрүллэр көмө хаһан кэҥэтиллиэн сөбүн туһунан кини ыйыталаста.
Георгий Степанов өрөспүүбүлүкэ сэрии оҕолорун статуһун бигэргэппит аҕыйах субъект ахсааныгар киирэрин этэн туран, олохтоох сокуон быһыытынан, кинилэргэ ый ахсын харчы төлөнөрүн иһитиннэрдэ.
Норуот дьокутаата Василий Николаев күн бүгүн төһө дохуоттаах киһи дьадаҥы диэн ааҕылларын туһунан интэриэһиргээтэ. Федеральнай Росстат ааҕарынан, дьиэ кэргэн хас биирдии чилиэнигэр тиксэр дохуот тиийинэн олоруу алын кээмэйиттэн кыра буолуо суохтаах. Ол кээмэйин бырабыыталыстыба кыбаартал аайы чуолкайдыыр, өрөспүүбүлүкэҕэ үлэлиир киһи тиийинэн олоруута 27 000 солк., сокуоннай сааһын ситэ илик оҕо 25 000 солк. тэҥнэһэр.
Хаартыска Саргын Скрябин, СИА.
-
0
-
0
-
0
-
0
-
0
-
0
