Уопсастыба

– Иккис «Күүлэйбитигэр» биэс хамаанда кытынна. Ол иһигэр, Остуолба нэһилиэгэ икки хамаанданы, «Тымныы чыпчаала» кэпэрэтиип, Дьааҥы куорат итиэннэ Боруулаахтан «Көдөй» үлэ-сынньалаҥ лааҕыра биирдии хамаанданы туруордулар. Барыта 25 киһи кэлэн, икки күн устата күүстээхтик үлэлээтилэр. «Күүлэй» сүрүн судьуйатынан тыа хаһаайыстыбатын управлениетын начаалынньыгын солбуйааччы Николай Николаевич Горохов үлэлээтэ.
Икки күннээх көхтөөх үлэ түмүгэр биэс хамаанда барыта холбоон 20,49 гектардаах ходуһа отун охсон, харбаан бүтэрдэ. «Итини отугар таһаардахха, 30 туоннаттан тахса буолуо», – диэтэ күрэх судьуйата. Бу – бастыҥ көрдөрүү, биһиги бу сыллар усталарыгар «Күүлэйи» 22 төгүл ыыттыбыт, ол тухары маннык үрдүк түмүгү ситиһэ илик этибит. Онон чахчы күүстээх кыайыы!

Бастакы миэстэни 5,46 гектар ходуһа отун охсон, харбаан, Остуолба нэһилиэгин 2 №-дээх хамаандата (капитан Кузьмин Иннокентий Иннокентьевич) ылла. Кинилэргэ «Тымныы чыпчаала» кэпэрэтиип грамотата туттарылынна, ону таһынан күрэх сүрүн спонсора Дьааҥы куорат кыраайы үөрэтэр музейын дириэктэрэ Наталья Сергеевна Габышева 100 000 солкуобайы туттарда. Бу бирииһи кини аҕата, Аҕа дойду Улуу сэриитин кыттыылааҕа, «Берлины ылыы иһин» мэтээл кавалера, өр сылларга Дьааҥы куоракка райпоҕа үлэлээбит, потребительскай кэпэрээссийэ туйгуна, Дьааҥы бочуоттаах олохтооҕо Сергей Гаврильевич Габышев 100 сыллаах үбүлүөйүгэр анаатылар.
Иккис миэстэни 5,14 гектаардаах ходуһа отун охсон, мунньан, «Тымныы чыпчаала» кэпэрэтиип хамаандата (капитан Сергей Васильевич Потапов) ылла. «Тымныы чыпчаала» кэпэрэтиип грамотатынан уонна 80 000 солкуобай харчынан наҕараадаланна. Үһүс миэстэҕэ 5,02 гектардаах ходуһа сирин охсон, мунньан, Остуолба 1 №-дээх хамаандата (капитан Дьуһаал Владимирович Горохов) таҕыста. «Тымныы чыпчаала» кэпэрэтиип грамотатынан уонна 50 000 солкуобай харчынан наҕараадаланна.

Төрдүс бочуоттаах миэстэҕэ Боруулаах орто оскуолатын «Көдөй» үлэ-сынньалаҥ лааҕыра (капитан Афанасий Дмитриевич Слепцов) тигистэ. Оҕолор улахан дьонтон төрүт хаалсыбатылар, 3,32 гектардаах ходуһа отун охсон, мунньан, 20 000 солк. харчыны туттулар. Дьааҥы куорат хамаандата (капитан Христофор Артурович Другин) 1,55 гектардаах сир отун охсон, мунньан бэһис миэстэ буолла, 15 000 солкуобайынан бэлиэтэннэ.

«Күүлэй» саамай саастаах харбааччыта Дьааҥы куорат олохтооҕо Ия Иннокентьевна Гороховаҕа анал бирииһинэн бэлиэтэннэ.

«Күүлэй» саамай эдэр кыттааччыта, от охсооччу, тохсус кылаас үөрэнээччитэ, Боруулаахтан сылдьар Юрий Винокуровка 5000 солк. харчы туттарылынна.

«Күүлэйгэ» 100 000 солк. харчыны спонсордаабыт Габышевтар дьиэ кэргэннэригэр «Алгыс» кэпэрэтиип аатыттан махтанан, үөрэн, астынан туран 2026 сыллаах төрүөх оҕус торбос сэртипикээтэ бэрилиннэ. Икки күн устата отууга араас минньигэс, тотоойу аһы астаан, үлэ дьонун аһаппыт асчыттарбытыгар Анна Фоминична Ефимоваҕа, Дария Александровна Стручковаҕа уоннуу тыһыынча солкуобай туттарылынна.
«Күүлэйгэ» кыттыбыт оҕолорго, ыччаттарга бука барыларыгар истиҥник махтанабыт. Остуолба нэһилиэгин икки хамаандатын чилиэннэрэ сыллата кыттан көмөлөһөллөр. Боруулаах «Көдөй» үлэ-сынньалаҥ лааҕырыттан дьиҥнээх үлэһит дьон тахсан эрэллэриттэн астынныбыт, оҕолор төрөппүттэригэр, учууталларыгар махтанабыт. «Тымныы чыпчаала» кэпэрэтиип хамаандатыгар Дьааҥы куорат оскуолатын 11-с кылааһын үөрэнээччилэрэ Афоня Горохов, Игорь Горохов хаһыс да сылын сырыттылар уонна Сергей Потапов, Николай Слепцов, Василий Готовцев Табалаахтан кэлэн үлэлээтилэр.

Сотору үһүс «Күүлэйи» ыытарга бэлэмнэнэбит, онно кэлэн кыттыахтара диэн эрэнэбит. Быйыл. элбэх ходуһа халаан уутугар былдьаммыт кыһалҕалаах кэмигэр, сүбэни-күүһү түмэн үлэлиир-хамсыыр хотуулааҕын «Күүлэйгэ» араас сиртэн (Дьааҥы куораттан, Остуолба, Табалаах, Боруулаах нэһилиэктэриттэн) кэлэн кыттыбыттара көрдөрөр. Кинилэри таһынан, практикаҕа кэлэ сылдьар студент Николай Винокуров (Үөһээ Бүлүү), оту пресстээһиҥҥэ үлэлиир Николай Портнягин (Чурапчы) көмөлөрө кырата суох. Онон, үтүө санаалаах, үлэһит ыччаттарга барыларыгар өссө төгүл махтанабыт!

Хаартыска: Тыа хаһаайыстыбатын управлениетын түһэриитэ.