Балаҕан ыйын 20 күнүнээҕи туругунан, бас билии көрүҥүттэн тутулуга суох бары хаһаайыстыбаларга өрөспүүбүлүкэ үрдүнэн 380 980 туонна от оттоммут. Ити былаан 90 %-а. Маны таһынан, 22 635 туонна сиилэс угуллубут, 6 935 туонна сенаж бэлэмнэммит.
Биирдиилээн улуустарынан ылын көрдөххө, былааннарын Ньурба уонна Аллараа Халыма улуустара 101 %, Уус Маайа улуустара 100 %, Сатай куораттааҕы уокурук 227 % толороннор, кыстыыр отторун хааччыммыттар.
«Былааммытын толоруохпут!»
Атын улуустар даҕаны кыраапыктарыттан хаалсыбакка, былааннарын толорор соруктаах үлэлии-хамсыы сылдьаллар. Холобур, 31 000 туоннаны оттуохтаах Амма улууһа 28 926 туонна оттоох, ону таһынан 2 000 туонна сиилэһи, 1 500 туонна сенаһы бэлэмнээн, сүөһү сүмэһиннээх аһылыгар сорудаҕын куоһарда. Оттон Уус Алдан улууһун сүрүн агронома Прокопий Белолюбскай маннык кэпсиир:
– Сайын саҕаланыытыгар, бэс ыйыгар курааннан бастаан куттаабыта, онтон кэлин ардахтар түһэннэр, хата, үүнүү куһаҕана суох буолан үөртэ. Былааммыт 30 000 туонна этэ, онтон 30 901 туоннаны чөкөттөбүт. Былааннарын Дүпсүн, Баатаҕай, Бороҕон, Бээрийэ уонна Тиит Арыы нэһилиэктэрэ толордулар. Ааспыт кыстыктан ордубут 1000 туонна кур оттоохпут, инньэ гынан, кыстыыр аһылыкпытын хааччынныбыт. Сорудахтарын толорбут хаһаайыстыбалар билигин сүрүннээн саппааска анаан оттуу сылдьаллар. Халаан тэбиититтэн кыстыыр отторун кыайан хааччыммат туруктаах улуустар бэрэстэбиитэллэрэ барыллаан кэпсэтиини саҕалаатылар, билиҥҥитэ ааҕына-суоттана сылдьаллар быһыылаах, оччону-баччаны ылабыт диэн чопчу дуогабардаһа иликтэр. Бурдукка биир гектартан ортотунан 10-нуу сэнтиниэр үүнүүнү ыларга суоттанабыт. Эмиэ курааннаан баран, кэлин ардаан, кэнчээрилээбитэ. Сэлиэһинэйи 250 гектар бааһынаттан 260 туоннаны хомуйдубут, аны 1 200 гектардаах эбиэспитигэр туруннубут. Халлааммыт эрэ туран биэрдэр дэһэбит.
Хаартыска: Эрэдээксийэ пуондата.
-
0
-
0
-
0
-
0
-
0
-
0
