Уопсастыба

Бэҕэһээ ватсаап ситимигэр Дьокуускай куорат «Айсберг” атыы-эргиэн киинигэр “Мистер Бин” маҕаһыынтан тулаайах оҕо улууска дьиэтигэр  бараары 1500 солк. үс устуука маасканы ылбытын уонна ол мааскалар тас өттүлэрэ «Псих» иҥин курдук араас суруктаахтарын сөҕөн-махтайан суруйбуттара өрөспүүбүлүкэни биир гына тилийэ көттө.

Бүгүн сарсыарда 10 чааска тугун-ханныгын билсээри «Айсберга» тиийдим. Ол сыаналаах мааскалары атыылыыр “Мистер Бин” маҕаһыын бастакы этээскэ  эскалатор аттыгар  турар, маҕаһыын да буолбатах, бутик аҥардаах. Атыылааччы уоллаах кыыс  ол араас дьүһүннээх мааскалары кэтэн тураллар. Кыыс биир кэм суотабайыгар тугу эрэ суруйар да суруйар. Араас ойуулаах-дьүһүннээх мааскалар элбэхтэр. Атыылааччы кыыстан ити табаардары хантан аҕалалларын, тоҕо итиччэ сыаналааҕын ыйыппыппар,  «Томскайтан ыыталлар. Үс хос таҥастаах буолан, сыаната итинник. Сууйа-сууйа, өтүүктүү-өтүүктүү хаста да туһаныахха сөп.  Сыаната уруккуттан итинник,  коронавирус  айдаана саҕаланыан инниттэн 449 солк. атыылыы турбуппут. Тас  өттүнээҕи ойуулара билиҥҥи   мультфильм, ыччакка аналлаах киинэлэр киэннэрэ», -- диэн хардарда. 

Салгыы «Туймаада»  атыы-эргиэн, сынньалаҥ киинигэр тиийдим. Бэһис этээскэ  таҕыстахха, эскалаторы утары турар «Мистер Бин»  кыра маҕаһыыҥҥа икки кыыс атыылыы тураллар. Салоҥҥа киирэн мааскалар тустарынан ыйыппыппар, билиһиннэрэн кэпсээн-ипсээн бардылар.  «Москваттан бэҕэһээ эрэ кэлбиттэрэ.  Тас өттүгэр баар ойуутун сөбүлээбэт буоллаххына, тиэрэн да баран кэтиэххин сөп», -- диэн быһаардылар. Сыаната тоҕо итиччэтин уонна тас  өттө тоҕо дьону соһутар «Псих” курдук араас суруктардааҕын-бичиктэрдээҕин, ойуулааҕын ыйыппыппар,   «Үс хос таҥастаах,  ол иһин итинник сыаналаах, олус эрэбил. Сууйа-сууйа хаста да туһаныахха сөп. Ойуутун туһунан бу диэн этэр кыахпыт суох, онтон итинниги ыыппыттар. Холобур, ити Кытайдыы суруктаах мааска тылбааһа «Безопасность» диэн эбит», -- диэн баран күлэн бычыгырыыллар. 

Көрөрбүт курдук, ити араас ойуулаах-бичиктээх мааскалар билиҥҥи ыччакка анаан оҥоһуллубуттар. Онтон сыанатын туһунан этэр буоллахха, биллэн турар, ыарахан.  Холобур, “Руно-мед” маҕаһыыҥҥа 100 устукалааах баачыка маасканы 450-500 солк атыылыыллар.

«Айсберг» атыы-эргиэн дьиэтигэр  атыылыы турар кыыстаах уолтан Томскайтан кимнээх аҕалан атыылыылларын  ыйыппыппар, адьас билбэппит диэтилэр. Арай, Дьокуускай куоракка баар администратор нүөмэрин биэрбиттэригэр эрийэн ыйыталаспыппар, төлөпүөнү истибит киһи «Мин  адьас атыылаабаппын, атын киһиэхэ тиийдигит”, -- диэн хардарда. Арааһа,  куотунна быһыылаах диэн сэрэйиллэр. Билигин маннык ыксаллаах кэмҥэ «Куһаҕантан ас таһаарынааччы элбэх».  Маннык түгэҥҥэ бары бэйэ-бэйэбитигэр көмөлөсүһүөхпүтүн наада. Урбаанньыттар сыананы аһара үрдэппэккэ, орто сүнньүн тутуһан атыылыыллара ордук этэ. Киһиэхэ суобас диэн баар.