«Орленок» бүтүн Арассыыйатааҕы оҕо киинин пресс-сулууспата СӨ Үөрэххэ уонна наукаҕа министиэристибэтигэр ойуур баһаарыттан эмсэҕэлээбит Горнай улууһун оҕолоро лааҕырга дуоһуйа сынньана сылдьар хаартыскаларын ыыппыт.
Оҕолор атырдьах ыйын 10 күнүгэр «Орленокка» тиийбиттэрэ. Хаартыскаттан көрдөххө, оҕолор сынньалаҥ лааҕырын тэтимигэр киирбиттэр уонна араас тэрээһиннэргэ көхтөөхтүк кытталлар.
Биһиги оҕолорбутун «Орленок» бүтүн Арассыыйатааҕы оҕо киинин «Стремительный» уонна «Солнечный» лааҕырдарыгар олохтообуттар. Манна күннээҕи хас биирдии бырагыраама уратылаах, сайыннарар-аралдьытар ис хоһоонноох. Оҕо сөбүлүүр дьарыгынан үлүһүйэн, күнүн атаарыан сөп. Ону кытта араас куонкурустар кытталлар, кутаа уот таһыгар олорон сэһэргэһэллэр, экскурсияларга сылдьаллар, сөтүөлүүллэр.
Үчүгэй сынньалаҥы тэрийбиттэрин иһин оҕолор Ил Дархан Айсен Николаевка, Саха сирин салалтатыгар, истиҥник көрсүбүттэрин иһин «Орленок» киин дириэктэригэр, кэлэктиибигэр махталларын тиэрдэллэр.
Санатар буоллахха, Горнай улууһун Бэс Күөлүн оҕолорун докумуоннарын чөлүгэр түһэрэннэр, СӨ Предпринимательствоҕа, атыыга-эргиэҥҥэ уонна туризмҥа, СӨ Үөрэххэ уонна наукаҕа министиэристибэлэрэ матырыйаалынай көмө оҥороннор, «Орленок» кииҥҥэ сынньата ыыппыттара.
- 0
- 0
- 0
- 0
- 0
- 0