Аллергиктар, оҕо күүтэр дьахталлар, искэн ыарыылаахтар “Спутник V” вакцина быһыытын ылаллара бобуллар. Марианна Данилова этэринэн, оҕолорун эмтэрэр ийэлэр уонна урут улаханнык аллергиялыы сылдьыбыт дьон быһыыны ылаллара сэрэхтээх. Маны таһынан вакцинаны искэн, хаан ыарыылаахтар уонна ньиэрбэлэрэ, иммуннай систиэмэлэрэ ыалдьар дьон ылалларыттан туттунуохтаахтар.
“Дьарҕа ыарыылара бэргии сылдьан баран, ремиссия туругар киирбиттэрин кэннэ, 2-4 нэдиэлэ буолан баран, дьон быһыыны ылыахтарын сөп”, -- диэн Марианна Данилова быһаарбыт. Оттон тымныйан, инфекционнай ис дьаҥынан ыалдьыбыттар үтүөрэн баран быһыыны ылаллара көҥүллэнэр.
Санатар буоллахха, “Спутник V” вакцина икки дозаттан турар. Бастакы дозаны ылан баран аллергиялаабыт дьоҥҥо иккис доза бэриллэрэ бобуллар диэн эпидемиолог-быраас быһаарда. “Быһыыны биэриэх иннинэ быраас киһи доруобуйатын чинчийэр – ханнык ыарыынан ыалдьа сылдьыбытын быһаарар, температуратын, хаан баттааһынын кээмэйдиир, тустаах докумуоҥҥа илии баттатар. Ол эрэ кэнниттэн быһыы бэриллэр”, -- диэн Марианна Данилова кэпсээтэ.
Быһыыны ылан баран пуунтан тута тахсан барбакка, 30 мүнүүтэ олорон доруобуйа туругун кэтиир наада диэн быраас сүбэлээтэ.
-
0
-
0
-
0
-
0
-
0
-
0
