Бу көҕүлээһин быраап күөмчүлээһинин туоратар уонна эрэгийиэн бары педагогтарыгар тэҥнээх усулуобуйаны хааччыйар соруктаах. Сүрүн саҥардыынан сокуоҥҥа көрүллүбүт бары мэктиэлэри, ол иһигэр идэҕэ ситиһиилэрин, учуонай истиэпэннэрин уонна бочуоттаах ааттарын иһин эбии төлөбүрдэри, судаарыстыбаннай дуу, муниципальнай дуу оскуолаҕа үлэлииллэриттэн тутулуга суох бары учууталларга тарҕаныаҕа. Урут маннык өйөбүл дьаһаллара судаарыстыбаннай үөрэх тэрилтэлэрин педагогтарыгар эрэ бэриллэллэрэ.
«Учууталлар ханна баҕарар — өрөспүүбүлүкэ эбэтэр муниципальнай таһымнаах оскуолаҕа буоллун, биир ураты суолталаах судаарыстыбаннай соругу толороллор. Ол иһин өйөбүл бары дьаһаллара биир тэҥ буолуохтаахтар. Биһиги быраап күөмчүлээһинин туоратан, систиэмэни ордук кырдьыктаах уонна өйдөнүмтүө оҥоробут», — диэн Кирилл Бычков бэлиэтээтэ.
Ону таһынан, сокуон барыла учууталлары көмүскүүр эбии дьаһаллары киллэрэр, ол иһигэр чааһынай олоххо орооһуллубат быраабы, ону тэҥэ үөҕүүттэн, кэнийииттэн көмүскүүр.
Былаас уорганнара уонна оскуола дьаһалталара бу бырааптары олоххо киллэрэргэ бары усулуобуйаны тэрийэн, сокуон туолуутун хааччыйыахтаахтар. Эбии төлөбүрдэри аныыр бэрээдэк судургутуйар: билигин төлөбүр кээмэйин бырабыыталыстыба быһаарыаҕа, бу төлөбүрдэри сокуоҥҥа уларытыы киллэрбэккэ эрэ, түргэнник индексациялыырга уонна билиҥҥи усулуобуйаҕа сөп түбэһиннэрэргэ кыах биэриэҕэ.
Мунньахха ону тэҥэ атын да суолталаах боппуруостар ырытылыннылар, ол иһигэр бүддьүөттэр икки ардыларынааҕы сыһыан, үлэ миэстэтин кубуоталааһын, итиинэн хааччыйар тэрилтэлэри субсидиялааһын бэрээдэгэр уларытыылар тустарынан сокуон барыллара, элбэх кыбартыыралаах дьиэлэри хапытаалынай өрөмүөннээһин бырагыраамата, кэргэн буолууну үөрүүлээх быһыыга-майгыга эрэгэстэрээссийэлиир ЗАГС-тар испииһэктэрин чуолкайдааһын, ону тэҥэ тыа хаһаайыстыбатын өйөбүлүгэр, министиэристибэлэр үлэлэригэр уонна судаарыстыбаннай өҥөнү оҥорууга сыһыаннаах нуормалыыр-быраап аахталарыгар көннөрүүлэр.
Хаартыскалар: Андрей Сорокин (СИА) түһэриитэ, Мэҥэ Хаҥалас улууһун
Аллараа Бэстээх 2 № оскуолатын кэлэктиибин тиксэриитинэн
-
5
-
0
-
0
-
0
-
0
-
0
