«Бары билэрбит курдук, дойдубут бэрэсидьиэнэ Владимир Путин бэйэни салайыныы публичнай былааһын систиэмэтигэр саҥа 33 федеральнай сокуоҥҥа илии баттаан, олоххо киллэрбитэ. Бу сокуоҥҥа олоҕуран, билигин регион бэрэстэбиитэллээх уорганнарын көрүүлэринэн сокуоҥҥа бэйэ усулуобуйатын, уратытын учуоттуур сөптөөх этиилэри ылыныыларыгар туһааннаах боломуочуйа бэриллэн, билигин үлэ бара турар. Онно биһиги өрөспүүбүлүкэбит Ил Дархана Айсен Сергеевич Николаев бу сокуон күүһүгэр киирээри турдаҕына, икки таһымнаах бэйэни салайыныы биһиги өрөспүүбүлүкэбитигэр оннунан хаалыахтааҕын туһунан бэйэтин санаатын этиитэ саамай оруннаах, муударай уонна мындыр этиинэн буолла. Бэйэни салайыныынан сүүрбэттэн тахса сыл олоруубутунан, норуот даҕаны билиниитинэн уонна билигин үлэлии-хамсыы олорор бэйэни салайыныы салалталарын санааларынан дьоҥҥо-сэргэҕэ саамай чугас былаас буолара бары өттүнэн дакаастанна. Онон ити икки таһымнаах былааска хаалыыбыт саамай сөптөөх, ыллыктаах этии диэн өйүүбүн.
Саха Өрөспүүбүлүкэтин муниципальнай тэриллиилэрин Сэбиэтин – муниципальнай тэриллиилэрин бииргэ үлэлээһиннэрин ассоциациятын чилиэннэрэ бу саҥа сокуон бу хайысхатын өйүүрбүт туһунан биллэрэбит. Бу саҥа 33 федеральнай сокуоҥҥа сүрүн боппуруостарынан, бастатан туран, биир ситимнээх былаас баар буолуохтаах. Улуус баһылыктарын талыыга улуус бэрэстэбиитэллээх уорганыгар, ол аата улуус дьокутааттарын мунньаҕар, норуотунан талыллыбыт дьоҥҥо, эппиэтинэс сүктэрэн, баһылыкка икки кандидатураны киллэрэн талларыы — быыбар биир саҥа ньымата буолар диэн бэлиэтиибит.
Иккиһинэн, нэһилиэктэр баһылыктарын быыбарыгар 33 федеральнай сокуоҥҥа сөп түбэһиннэрэн, аныгылыы саҥа көрүүлээх-истиилээх, билиҥҥи уустук кэмнэргэ бары биир сомоҕо буолан үрдүк таһымнаахтык, хамсатыылаахтык үлэлиир-хамсыыр дьону конкуруснай балаһыанньаҕа сөп түбэһиннэрэн нэһилиэк дьокутааттарын көрүүтүнэн, быһаарыытынан бигэргэттэрэр ньыма саамай сөптөөх дии саныыбыт. Үсүһүнэн, бэйэни салайыныы уорганнарыгар сүрдээх улахан боломуочуйалар бааллар. Маны сөптөөхтүк тыырсан, ханнык хайысхата муниципальнайын, ханныга судаарыстыбаннай таһымнаах боломуочуйа буоларын, саамай сүрүнэ үптээх-харчылаах боломуочуйаларга улахан болҕомто ууран үлэлиир өттүн ордук күүскэ чочуйарбыт эрэйиллэр. Итилэри чуолкайдык быһаарынан өрөспүүбүлүкэбит сокуонугар ылыннахпытына, төрөөбүт түөлбэбит, улууспут, өрөспүүбүлүкэбит, модун Россиябыт сайдыыларыгар бары хайысханан сөптөөхтүк тэринэн-салайынан олорор кыахпыт өссө кэҥиир, улаатар кэскиллээх.
Бу федеральнай сокуон бэс ыйын 19 күнүгэр күүһүгэр киирэр. Биһиги өрөспүүбүлүкэбитигэр бу күһүн Ил Түмэн көрүүтүнэн манна сыһыаннаах сокуоннарга уларытыылар киллэриллэн, бигэртилиннэхтэринэ, 2026 сыл тохсунньу 1 күнүттэн сокуон күүһүгэр киирэн, үлэ-хамнас салгыы барыахтаах. Онон биһигиттэн, муниципальнай тэриллиилэртэн, бу саҥа федеральнай сокуон чэрчитинэн биһиги өрөспүүбүлүкэбит сокуонугар туох-ханнык этии киирэриттэн олохтоох былаас хайдах буолара быһаччы тутулуктааҕын бэлиэтээн тураммын, дьоммутун-сэргэбитин Айсен Сергеевич Николаев ыллыктаах этиилэрин сөптөөхтүк өйдөөн, ылынан, күүскэ өйүөҕүҥ, Ил Дархаммыт тула түмсүөҕүҥ, үлэлиэҕиҥ-хамсыаҕыҥ диэн ыҥырабын!»
Хаартыска НВК Саха саайтыттан
-
1
-
0
-
0
-
0
-
0
-
0
