Билиҥҥитэ 16 баһаар баара бэлиэтэнэр, олор нэһилиэнньэлээх пууннарга суоһаабаттар.
Сайын биир кэмҥэ сууккаҕа 5000 киһи баһаары бохсууга үлэлээбитэ. Итинтэн аҥаара баҕа өттүнэн көмөлөһөөччүлэр, олохтоох нэһилиэнньэ дьоно этэ.
Ил Дархан айылҕа алдьархайын туоратыыга улахан өҥөлөөх дьоҥҥо “Ойуур баһаардарын умуруоруу кыттыылааҕа”диэн өйдөбүнньүк бэлиэлэри туттартаата.
“Тулуурбутун тургутар уустук сайын ааста. Нэһилиэнньэлээх 46 пууҥҥа уот киирэ сатаабыта, ону түмсүүлээх буоламмыт куоттарбакка туппуппут. РФ Бэрэсидьиэнэ Владимир Путин быһаччы дьаһалынан, киинтэн улахан көмө кэлэн, күөдьүйэн бара турар уоту умуллардыбыт. Барыта 25 тыһыынча киһи сайын устата баһаары бохсууга үлэлэстэ. Омугуттан, сааһыттан, дьахтарыттан-эр киһититтэн тутулуга суох, бары биир киһи курдук турунан, бу ааҥнаабыт иэдээни кыайдыбыт”, -- диэн Ил Дархан Айсен Николаев эҕэрдэлииригэр тоһоҕолоон эттэ.
Доброволецтар уопсастыбаннай ыстааптарын салайбыт Афанасий Алексеевка, Айыл Дьулурха Маартыс Уолугар, Константин Борисовка, Александр Жураковскайга, Анжелика Андрееваҕа, Гаврил Кононовка, Ольга Григорьеваҕа уо.д.а махтанан туран наҕараадалары туттартаата.
Балтараа ый иһигэр бу ыстаабы кытта 1268 волонтер үлэлэһэн ааспыт. Улахан көмөнү Мэҥэ Хаҥалас, Таатта, Кэбээйи түмсүүлэрэ уонна 173 тэрилтэ (ол иһигэр биирдиилээн урбаанньыттар, национальнай диаспоралар) оҥорбуттар.
Манна даҕатан эттэххэ, соҕурууттан быраастар биригээдэлэрэ кэллэ. Баһаарга үлэлээбит дьон доруобуйаларын туругун балаҕан ыйын 14-24 күннэригэр Дьокуускай 3-с №-дээх балыыһатыгар босхо көрүөхтэрэ.
-
0
-
0
-
0
-
0
-
0
-
0
