Зоя Афанасьевнаны РСФСР Үрдүкү Сэбиэтин XII ыҥырыытын, Судаарыстыбаннай Дуума II ыҥырыытын, Ил Түмэн II, III, IV ыҥырыытын чаҕылхай дьокутаатын быһыытынан билэбит. Күн сириттэн барбыта биир сылыгар тахсыбыт бэрт халыҥ кинигэҕэ Ил Дархан Айсен Николаев, Ил Түмэн бэрэссэдээтэлэ Алексей Еремеев киирии тыллара киирдилэр.
Ону таһынан, өрөспүүбүлүкэни 2010-2018 сс. салайбыт Ил Дархан Егор Борисов, Саха Сирин 2002-2010 сс. бэрэсидьиэнэ Вячеслав Штыров, бырабыыталыстыбаҕа, Ил Түмэҥҥэ бииргэ үлэлээн, алтыһан ааспыт үрдүк дуоһунастаах салайааччылар, дьокутааттар, чугас дьонун, көмөлөһөөччүлэрин, дьиэ кэргэнин ахтыыта тиһилиннэ.
Кинигэни хаһыакка араас кэмҥэ тахсыбыт Зоя Афанасьевна интервьюлара, өрөспүүбүлүкэ, федеральнай киин таһымыгар оҥорбут иһитиннэриилэрэ, санаатын үллэстиитэ ситэрэн биэрдэ. Куар-куод көмөтүнэн киирэн, видео матырыйааллары көрүөххэ сөп. Бары үлэлэрин, отчуотун 535 сыылкалаах библиографическай ыйынньыга киирдэ.
«Өрөспүүбүлүкэ бочуоттаах олохтоохторо» сериянан тахсыбыт кинигэ сүрэхтэниитин Ил Түмэн вице-спикерэ Юрий Николаев ыытта. «Зоя Афанасьевна туруорсуутунан Саха Сиригэр оройуоннааҕы эбиликпитин ыһыктыбакка оннунан хаалларбыта, айылҕа баайыттан, алмаастан, кыһыл көмүстэн өрөспүүбүлүкэ өлүү ылар кыахтаммыта, Дьокуускайга аан дойду таһымнаах Мэдиссиинэ киинэ тутуллубута», — диэн билиһиннэрдэ Юрий Михайлович.
Зоя Корнилова Арассыыйа улахан бэлиитикэтигэр саха дьахталларыттан үрдүкү кэрдиискэ ким даҕаны тахса илигинэ парламентаризм устуоруйатыгар бастакы суолу тэлбитэ. Дириҥ билиитинэн-көрүүтүнэн, интеллектуальнай таһымынан РСФСР Үрдүкү Сэбиэтин президиумун чилиэнинэн талыллыбыта тарбахха баттанар сэдэх түбэлтэ этэ. Бу Бырабыыталыстыба бэрэссэдээтэлин солбуйааччытыгар тэҥнэһэр хабааннаах дуоһунас. Саха киһитэ үлэлиэхтээҕэр буолуох, чарапчыланан даҕаны көрбөтөх үрдүкү чыпчаалын кыра хатыҥыр дьүһүннээх, нарын саннылаах эрээри, модун күүстээх ис санаалаах саха дьахтара ситиспитэ.
Кини Москубаҕа РФ Бэрэсидьиэнин иһинэн Саха Сирин бастайааннай бэрэстэбиитэлинэн үлэлээбитэ. Хотугу норуоттар бырааптарын көмүскээн, төлөннөөх, уоттаах-күөстээх этиилэрин ООН, ЮНЕСКО былаһааккаларыгар иһитиннэрбитэ. Көҕүлээбит, киллэрбит сокуоннара билигин даҕаны норуот туһатыгар үлэлии тураллар. Зоя Афанасьевна олорбут олоҕо дойдуга бэриниилээх буолуу, норуотун туһугар сулууспалааһын сырдык холобурун быһыытынан устуоруйаҕа көмүс буукубанан суруллар.
Кинигэҕэ илиинэн суруллубут автобиографията, кылаас салайааччытын характеристиката, ВЛКСМ-ҥа киирэригэр 1953 с. суруллубут пионерскай дружина мэктиэ суруга, КПСС киирэр докумуоннара тиһилиннилэр.
Ол туһунан сиһилии "Ил Түмэн" хаһыат кэлэр нүөмэригэр ааҕыҥ.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
