Кинигэҕэ киирбит ахтыылар, Зоя Афанасьевна өр кэмҥэ мунньубут үлэтин, отчуотун, иһитиннэриитин таһынан суруйааччы, СӨ үтүөлээх юриһа, ССРС Борокуратууратын бочуоттаах үлэһитэ Николай Борисов –Уус «Олох чорооно» диэн документальнай романыттан быһа тардыы ааҕааччы интэриэһин тардыан сөп. Ааптар ССРС ыһыллар кэмигэр федеративнай дуогабары баттаһыы дойдуну быыһаабытын көрдөрөр. Федеративнай дуогабар Борис Ельцин биэрбит суверенитетын ылан тус-туһунан бара сатыыр субъектары түмэ тардан, саҥа бигэ туруктаах судаарыстыбаны олохтуурга тирэх буолбута, ону кытта национальнай өрөспүүбүлүкэлэр дьылҕалара хайдах салаллыбыта кинигэҕэ сырдатыллар.
СӨ Култууратын уонна духуобунай сайдыытын миниистирэ Афанасий Ноев ССРС миниистирдэрин сэбиэтин 1985-1990 сс. бэрэссэдээтэлэ Николай Рыжков, РСФСР Үрдүкү сэбиэтин 1991-1993 сс. бэрэссэдээтэлэ Руслан Хасбулатов, Судаарыстыбаннай Дуума Уһук Илини уонна Аартыканы сайыннарыыга сис кэмитиэтин бэрэссэдээтэлэ Николай Харитонов о.д.а. биллэр-көстөр бэлитиичэскэй диэйэтэллэр Зоя Афанасьевна норуотун туһугар килбиэннээх үлэтин, киһи быһыытынан үтүө майгытын туһунан истиҥ-иһирэх ахтыылара кинигэҕэ киирбитин кэрэхсии көрбүтүн туһунан эттэ.
«Зоя Афанасьевна Саҥа Саха Сирэ ХХ-ХХI үйэлэр алтыһыыларыгар судаарыстыбаннаһа бөҕөргүүрүгэр, саҥа тутул оҥоһуллан тахсарыгар сүҥкэн үлэни ыыппыта. Чаҕылхай парламентарий, дьокутаат быһыытынан кинигэҕэ арылхайдык аһыллар. Дьокутаат — сокуону оҥорор, сокуоҥҥа олоҕуран дойду сайдар, киһи олоҕун оҥкула оҥоһуллар.
Кини дьокутаат быһыытынан киллэрбит өҥөтө, дойду судаарыстыбаннаһын тутарга Төрүт сокуонтан саҕалаан, федеративнай дуогабарга тиийэ Арассыыйа таһымыгар үлэлэспитин туһунан суруллар. Тыа сиригэр өҥ буордаах Өлүөхүмэ улууһун Кыыллаах Арыы нэһилиэгэр төрөөбүт, оҕо сааһа аас-туор аччык сэрии кэмигэр ааспыт киһи норуотун кыһалҕатын иһиттэн билэр. Кини үтүө аатын көлүөнэттэн көлүөнэҕэ биэрэргэ бэртээхэй кинигэ таҕыста, ону дьоҥҥо-сэргэҕэ тарҕатыахтаахпыт», — диэтэ Афанасий Ноев.
Кинигэ биһирэмин кэмигэр саха дьахталларыттан экэниэмикэ билимин бастакы хандьыдаата буоларын быһыытынан, бу хайысханан Зоя Корнилова аатынан бириэмийэ олохтуурга, үөрэх кыһатыгар кини аатын иҥэрэргэ этии киллэрдилэр.
Төрөөбүт төрүт дойдутун өҥ буордаах Өлүөхүмэ улууһун баһылыга Николай Харбин Зоя Афанасьевнаны оскуолаҕа үөрэнэр кэмиттэн билэрин, кининэн киэн туттарын биллэрдэ. Быыһык кэмҥэ саҥа судаарыстыбаннаһы тутарга сүҥкэн кылаатын киллэрбит бэлитиичэскэй, судаарыстыбаннай диэйэтэл албан аатын үйэтитэргэ оскуолаларга кылаас чаастарын ыыталларын, төрөөбүт нэһилиэгин уулуссатыгар кини аатын иҥэрбиттэрин туһунан иһитиннэрдэ.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
