Былырыын Счетнай балаата 129 тэрээһини ыыппыт, онтон 55 хонтуруоллуур, 74 эспиэр-аналитика үлэтэ оҥоһуллубут. Кинилэр 192 эбийиэги бэрэбиэркэлээбиттэр. Бүддьүөт харчытын туттууну бэрэбиэркэлээһин түмүгэр 9,9 млрд. солк. кэһии баара биллибит. Онтон 6,6 млрд. солк. буҕаалтыр отчуотун кытта сибээстээх. Бүддьүөтү толорууга 3,1 млрд. солк. кэһии тахсыбыт. Бэрэбиэркэ түмүгүнэн матырыйааллары СӨ Борокуратууратыгар, Сэлиэстийэ кэмитиэтигэр, Ис дьыала министиэристибэтигэр, УФСБ Саха Сиринээҕи салаатыгар ыыппыттар. Ааспыт сылы кытта тэҥнээтэххэ, административнай боротокуолу толоруу икки төгүл үрдээбит. 60-ча боротокуол толоруллан, 35 ыстараап суруллубут, 17 сэрэтии бэриллибит. Административнай ыстарааптан 532 тыһ. солк. киирбит.
Хомунаалынай хаһаайыстыбаны субсидиялааһын ороскуота 60-ча млрд. солк. тиийэн, өрөспүүбүлүкэ бүддьүөтүгэр улахан ноҕорууска буолар. Счетнай балаата ороскуоту көҕүрэтэргэ подведомственнай тэрилтэлэргэ салайар аппарааты кыччатыахха сөбүн, гаас ситимин нэһилиэктэргэ салгыы киллэрэн иһэр наадалааҕын ыйда, итиэннэ ким төһө сылааһы, ууну туттубутун учуоттуур тэрили туруорарга ыҥырда.
2026 с. былаанын билиһиннэрдэххэ, Счетнай балаата бэйэтин боломуочуйатын иһинэн 139 тэрээһини ыытыаҕа, сүрүн болҕомтону өрөспүүбүлүкэтээҕи саҥа онкологическай диспансеры, ГУП ОДьКХ, Мииринэй ПТВС чэпчэтиилээх тарыыбын, хапытаалынай өрөмүөн пуондатын о.д.а. бэрэбиэркэлииргэ ууруохтара. Арассыыйа Счетнай балаататын кытта хаарбах дьиэттэн дьону көһөрүүнү, уһуйааннарга 2018-2025 сс. саҥа миэстэни таһаарыыны чинчийиэхтэрэ.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
