Бэлиитикэ

Мунньах кэмигэр вице-премьер РФ Бэрисидьиэнэ уонна Бырабыытылыстыбата эрэгийиэннэри кириисис кэмигэр өйүүргэ анал миэрэлэри олохтообуттарын санатта. Ол курдук, федеральнай бүддьүөттэн судаарыстыбаннай тэрилтэлэр, дьоҕус уонна орто урбаан, доруобуйа харыстабылын өйөбүллэригэр Саха сиригэр 18,13 млрд солк көрүллүбүт. Мантан үгүс миэрэ номнуо олоххо киирбит. Быраастарга, оҕолоох ыалларга төлөбүрдэр оҥоһуллубуттар. Судаарыстыбаннай хампаанньаларга чэпчэтиилээх кирэдьииттэр бэриллибиттэр, дьоҕус уонна орто урбааҥҥа субсидиялар көрүллүбүттэр.  

– Мин булгуччу хас биирдии Уһук Илиҥҥи эрэгийиэҥҥэ туох буола турарын билиэхтээхпин. Балаһыанньа уустук. Бүтүн аан дойду дьоно-сэргэтэ уонна дойдубут, Саха сирэ, коронавируһу утары охсуһаллар. Ити дьаҥ экэниэмикэҕэ, социальнай эйгэҕэ, дьон олоҕор уонна доруобуйатыгар улаханнык сабыдыаллаата. Экэниэмикэ эйгэтин түһүүлэрин биһиги чопчу көрөбүт. Бүгүҥҥү мунньах буола турар миэстэтэ мээнэҕэ талыллыбата. Нерюнгрига “Колмар” хампаанньа бырайыактара олоххо киирэ тураллар. Билиҥҥитэ ситиһиилээхтик. Бу федеральнай өйөбүлү ылбыт биир бастакы бөдөҥ инвестиционнай бырайыак. Билигин хампаанньа тэтимнээхтик сайдан иһэрэ харахха быраҕыллар. Үлэ миэстэтин таһаарар, таас чоҕу байытар фабрикалары тутар... Бу сырыым чэрчитинэн урутаан сайдар территориялар атын бэрэстэбиитэллэрин кытта эмиэ көрүстүм. Ити бырайыактар бары олус суолталаахтар. Тоҕо диэтэххэ, кинилэр көмөлөрүнэн дьон үлэлээх-хамнастаах буолар. Оттон эрэгийиэҥҥэ эбии үп-харчы киирэр, – диэн Юрий Трутнев бэлиэтээтэ.  

Коронавирус тарҕаныытын бопсууга Уһук Илин биир кэлим сайдыытын тэрилтэлэрэ үлэлэһэллэр. Вице-примьер быйыл Уһук Илин сайдыытын пуондата Саха сиригэр коронавируһу кытта охсуһууга 70,2 тыһ. респираторы, 28,7 тыһ. көмүскэнэр ачыкыны, 50,7 тыһ. комбинезоны, 16,2 тыһ. ханыы бэрчээккэни көмө быһыытынан биэрбитин иһитиннэрдэ.

Мунньах кэмигэр Юрий Трутнев эрэгийиэҥҥэ эбии өйөбүл көрүллэр боппуруостарын дьүүллэстэ. РФ Доруобуйаҕа харыстабылын министиэристибэтигэр Саха сирин бүддьүөтүгэр санрейстарга эбии үп-харчы көрөллөрүгэр сорудахтаата.

– Саха Өрөспүүбүлүкэтин сирэ-уота киэҥ. Нэһилиэнньэлээх пууннар бэйэ-бэйэлэриттэн олус ыраах сыталлар. Онон коронавирус курдук уустук ыарыыга мэдиссиинэ суһал көмөтүн оҥорор уустук. Анаалыс кэлиитэ-барыыта 7-8 хонукка тэҥнэһэр. Ити кэм устата ыарыһах туруга лаппа мөлтүүрэ сэрэйиллэр. Инньэ гынан миэстэтигэр эбии лабаратыарыйалары тэрийиэххэ эбэтэр суһаллык авиационнай тырааныспарынан хааччыйыахха наада. Анаалыс түмүктэрэ 3 күн иһинэн биллэллэрин ситиһиэхтээхпит, – диэн вице-премьер тоһоҕолоото.  

Маны таһынан, мунньахха Саха сирин социальнай экэнэмиичэскэй сайдыытын балаһыанньата көрүлүннэ. Ол курдук, 2020 сыл 8 ыйын түмүгүнэн бырамыысылыннас 11 %, инвестиция – 39,2 %, тутуу – 52,6 %, атыы-эргиэн – 10 % түспүттэр. Оттон үлэ суох дьон ахсаана 5,8 % үрдээбит. Онон РФ Үпкэ министиэристибэтигэр өрөспүүбүлүкэ балаһыанньатын сыныйан үөрэтэргэ уонна эрэгийиэннээҕи бырабыытылыстыбаны кытта бииргэ үлэлэһэн бүддьүөт чааһыгар саҥа этиилэри оҥорон киллэрэллэригэр сорудахтаата.

Мунньах түмүктүүр чааһыгар, вице-премьер эрэгийиэн социальнай экэнэмиичэскэй сайдыытын сүрүн сыалларын ситиһэргэ федеральнай уонна өрөспүүбүлүкэтээҕи былаас уорганнара бары уһулуччу эппиэтинэһи сүгэллэрин санатта.

– РФ Бырабыытылыстыбата, өрөспүүбүлүкэ салалтата, бырамыысыланнас тэрилтэлэрэ балаһыанньаны тупсарарга, бүддьүөт туолуутун, нэһилиэнньэ олоҕо-дьаһаҕа куттала суох буолуутун ситиһэргэ бары кыаҕы туһаныахтаахпыт, – диэн Юрий Трутнев түмүктээтэ.