Кулун тутар 14 күнүгэр норуодунай дьокутаат Ньурбачаан, Дьаархан, Чаппанда уонна Антоновка сс. нэhилиэнньэтин кытта кѳрүстэ.
Олохтоохтор тупсаран оҥоруу, гаастааhын, саҥа хочуолунайдары тутуу, оскуолалары ѳрѳмүѳннээhин, ыттар кыhалҕаларын, Ѳлүѳнэ ѳрүhү туоруур муоста ханнык этаапка сылдьарын, федеральнай уонна ѳрѳспүүбүлүкэ сокуоннарыгар уларыйыылар тустарынан ыйыттылар.
Дьону 2023 сыл кулун тутар 1 күнүгэр күүhүгэр киирбит ноhуому туттуу туhунан федеральнай сокуон, бу сокуон кэтэх хаhаайыстыбаларга хайдах сабыдыаллыан сѳбѳ долгутар.
Чуолаан ыллахха, 567 киhи олорор Ньурбачаан сэлиэнньэтигэр гаастааhын, оскуоланы, балыыhаны тутуу, ититэр систиэмэҕэ холбонуу уонна тупсаран оҥоруу боппуруостара кѳтѳҕүлүннүлэр. Ону тэҥэ биэнсийэлэр кээмэйдэрин улаатыннарыыга, баhаар кэнниттэн хаалбыт сылбаҕы хомуйууга сыhыаннаах ыйытыылар киирдилэр.
Дьаархан сэлиэнньэтин олохтоохторо уматык сыанатын регулировкалааhын боппуруоhун туруорсаллар. Манна нэhилиэнньэҕэ дириҥэтиллибит медицинскэй кѳрүүнү тэрийэргэ этии киирдэ.
Чаппандаҕа саҥа балыыhа тутуутун, гаастааhын, Ѳлүѳнэ ѳрүhү уонна Үѳhээ Бүлүү с. аннынан Бүлүү ѳрүhүн туоруур муосталар, уот, гаас тарыыптарын тустарынан ыйытыылары биэрдилэр, итиэннэ быраҕыллыбыт дьиэлэр уонна бааhыналар кыhалҕаларын быhаарарга эттилэр.
Парламентарийы кытта Ньурба улууhун нэhилиэнньэтин кытта кѳрсүhүүлэргэ СѲ Баhылыгын сүбэhитэ Георгий Балакшин кыттар.
Кулун тутар 15 күнүгэр Владимир Прокопьев Хатыы, Маалыкай, Малдьаҕар, оттон кулун тутар 16 күнүгэр Чуукаар, Ѳҥѳлдьѳ, Хорула сс. олохтоохторун кытта кѳрсѳрѳ былааннанар.
Источник: Ил Түмэн пресс-сулууспата.
-
0
-
0
-
0
-
0
-
0
-
0
