Уопсастыба

Ил Түмэн байыаннай сулууспалаахтар, бойобуой дьайыылар бэтэрээннэрин дьыалаларыгар, патриотическай иитиигэ уонна уопсастыбаннай тэрилтэлэргэ сис кэмитиэтин бэрэссэдээтэлэ – Ил Түмэн Бэрэссэдээтэлин солбуйааччы Александр Подголовы кытары тус көрсүһүүгэ кэлбит кыраасданнар социальнай көмө, Анал байыаннай дьайыы бэтэрээннэригэр уонна кинилэр дьиэ кэргэттэригэр өйөбүл тула сэһэргэстилэр, кыһалҕаларын үллэһиннилэр.
Тулаайах оҕолору дьиэнэн хааччыйыы, Анал байыаннай дьайыы кыттыылааҕынан билинии итиэннэ бойобуой дьайыылар бэтэрээннэрин ыстаатыһын оҥорторуу боппуруостарын чопчуластылар. Анал байыаннай дьайыы кыттыылаахтарын ыараханнык бааһырыы кэнниттэн байыаннай-врачебнай хамыыһыйаны кэмигэр барыы боппуруоһа долгутарын биллэрдилэр. Байыаннай сулууспалаахтары көрдөөһүҥҥэ, байыас хайдах өлбүтүн бэрэбиэркэлииргэ уонна хаартыскаттан сокуоннайа суох уһуллубут харчыны тустаахха төннөрөргө көмө наадатын туһунан эттилэр. Ону таһынан, оҕолоох дьиэ кэргэттэр социальнай өйөбүл дьаһалларыгар тииһиниилэрин, инбэлиит уонна «куотан кэлбит» диэн ыстаатыстаах кыраасданнар олорор сирдэригэр эрэгистирээссийэлэрин болдьоҕун уһатыы боппуруостара таарыйылынна. Норуот дьокутаата дьон этиитин болҕомтолоохтук истэн баран, элбэҕи сүбэлээтэ-амалаата уонна тустаах уорганнарга итиэннэ ыйытыктары ыытарга быһаарда.
Ил Түмэн судаарыстыба тутулугар уонна сокуону оҥорууга сис кэмитиэтин бэрэссэдээтэлэ – Ил Түмэн Бэрэссэдээтэлин солбуйааччы Афанасий Владимировы кытары көрсүһүүгэ кэлбиттэр кыраасданнар бырааптарын эйгэтигэр этиилээх эбиттэр. Быраабы араҥаччылыыр уорганнар көһүүн сыһыаннарыттан бас билэр баайга хоромньу оҥоһуллубутун туһунан К. кэпсээтэ. Онуоха норуот дьокутаата боппуруоһу тус хонтуруолугар ыларын биллэрдэ, Ис дьыала министиэристибэтигэр ыйытык ыытыах буолла.
Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Андрей Находкиҥҥа биир инбэлиит киһи сир учаастагын кыһалҕатынан кэлбит. Кини олорор дьиэ туттарыгар анаан сир учаастагын ылыан баҕарара кыаллыбатаҕын истэн баран, норуот дьокутаата боппуруоһу иҥэн-тоҥон үөрэтиэх, тустаах биэдэмистибэлэри кытары үлэлэһиэх, ол кэнниттэн хардатын официальнайдык тиксэриэх буолла.
Тыа хаһаайыстыбатын сайдыытын, уопсайынан тыа сирин өйөөһүҥҥэ сыһыаннаах боппуруостардаах, этиилэрдээх дьоннор Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласовка сырыттылар. Норуот дьокутаатын кытары атах тэпсэн олорон, үгэс буолбут хаһаайыстыбаннай дьарыктары, ол эбэтэр сүөһү-сылгы иитиитин салгыы сайыннарыы, судаарыстыба өйөбүлүн ырычаахтарын тупсарыы туһунан сэһэргэстилэр. Үлэ эбийиэктэрин гаас ситимигэр холбооһуҥҥа туох ыарахаттары көрсөллөрүн кэпсээтилэр, үүт харчытын итиэннэ үүт соҕотуопкатын көрдөрүүтүн үрдэтэргэ үбүлээһин хайдах оҥоһуллара ордук көдьүүстээх буолуоҕун туһунан санаа атастастылар. Александр Атласов кыһалҕаны хайдах быһаарыахха сөбүгэр бэйэтин көрүүтүн эттэ, элбэх сүбэни-аманы биэрдэ, киирбит этиилэри салгыы үлэлииргэ учуокка ылла.
Норуот дьокутааттарын кытары тус көрсүһүүгэ эрдэттэн Ил Түмэн Уопсастыбаннай приемнайдарыгар: Дьокуускай куорат, Ярославскай уулусса, 24/1 №-дээх дьиэтигэр, 117-с кэбиниэккэ итиэннэ https://www.iltumen.ru/reception. интэриниэт-приемнайыгар суруйтарыллар. Сиһилии 8 (4112) 43-53-74 төлөпүөнүнэн эрийэн билсиэххэ сөп.
Норуот дьокутааттарын кытары тус көрсүһүү көдьүүстээх түмүктээх буоларын туһугар сайабылыанньалары уонна этиилэри эрдэттэн бэлэмнээн, суруйан аҕалар итиэннэ туруорсар боппуруоска сыһыаннаах докумуоннары илдьэ кэлэр ордук. Тус көрсүһүү кыраапыгын Ил Түмэн саайтыттан билсиҥ.

Хаартыска: Ил Түмэн пресс-сулууспата.