Мунньах кыттыылаахтара кэккэ суолталаах боппуруостары көрдүлэр. Ол курдук, үп миниистирэ Валерий Жондоров өрөспүүбүлүкэ 2021 сыллааҕы уонна 2022-2023 сыллардааҕы барыллаан бүддьүөтүгэр киирбит уларыйыылары кытта билиһиннэрдэ.
Маныаха, бастатан туран, улуустарга көрүллэр трансферт кээмэйэ 2 343 мөл. солк. улааппытын уонна 82 113,8 мөл. солк. тэҥнэспитин иһитиннэрдэ. Эрдэтээҕи былааҥҥа 79 770,5 мөл. солк. баара.
Маны таһынан, Дьокуускай куорат дьаһалтатыгар Саха АССР тэриллибитэ 100 сыллаах үбүлүөйүн дьоһуннаахтык тэрийэригэр эбии 100 мөл. солк. кыттыгас үбүлээһин көрүллүбүтүн эттэ.
Мунньах кэмигэр норуот дьокутааттара Виктор Губарев, Михаил Гуляев, Иван Данилов дотация кээмэйигэр, дьэллик кыыллар боппуруостарыгар, аччыгый авиация сайдыытыгар, нэһилиэктэр бүддьүөттэрин хааччыйыыга сыһыаннаах чопчулуур ыйытыылары биэрдилэр.
Салгыы дьокутааттар нэһилиэктэр олохтоох суолталаах боппуруостары бэйэлэрэ быһааралларын көҥүллүүр өрөспүүбүүлүкэтээҕи сокуон барылын көрдүлэр уонна өйөөтүлэр. Бу сокуон барылын Горнай улууһун дьокутааттарын Сэбиэтин бэрэссэдээтэлэ Алквиад Тарасов билиһиннэрдэ.
Ол курдук, 131 №-дээх федеральнай сокуон 14 ыстатыйатын 7 пуунунан нэһилиэнньэҕэ тырааныспар өҥөтүн тэрийии уонна нэһилиэк иһигэр дьону тиэйии-таһыы улуустар бэйэлэрэ быһаарар боппуруостара буолара этилиннэ. Вице-спикер Виктор Губарев бу уопуту өрөспүүбүлүкэ бары улуустарыгар тарҕатыахха диэтэ.
Мунньах кыттыылаахтара сокуон барылын бастакы ааҕыыга бигэргэтэргэ диэн этии киллэрдилэр.
Бу кэннэ улуус дьокутаатын уонна баһылыгын мэктиэлэрин туһунан сокуон барыла көрүлүннэ. Ону таһынан, норуот дьокутааттара кэккэ федеральнай сокуоннары Ил Түмэҥҥэ киллэрэн көрөргө диэн быһаарыныы ылыннылар.
-
0
-
0
-
0
-
0
-
0
-
0
