Бэлиитикэ

 «Газпром газификация» ХЭТ былаһааккатыгар call-центр тэриллибитэ, сайаапкалары гааһы киллэрии биир кэлим, итиэннэ эрэгийиэннээҕи эпэрээтэрдэрин саайтарын нөҥүө, ону тэҥэ Судаарыстыбаннай өҥө порталга уонна МФЦ-га туталлар.

– Социальнай гааһы ситиһиилээхтик киллэрии төрдө – былаас бары таһымын түмүүгэ сытар, – диэн Ил Түмэҥҥэ «Биир ньыгыл Арассыыйа» фракция салайааччыта Антонина Григорьева бэлиэтиир.

Фракция чилиэттэрэ ити үлэҕэ күүскэ ылыстылар. Билиҥҥи кэмҥэ нэһилиэнньэҕэ социальнай гааһы киллэриигэ балаһыанньалары үөрэтэр, өйдөтөр үлэлэр бара тураллар,итиэннэ наадалаах докумуоннары бэлэмнииргэ көмөлөһөллөр. Чэпчэтиинэн туһанар нэһилиэнньэҕэ (Аҕа дойду Улуу сэриитин кыттыылаахтарыгар, инбэлииттэргэ, үп-харчы өттүнэн тиийиммэттэргэ, соҕотох олорор биэнсийэлээхтэргэ уонна элбэх оҕолоох ыалга) сокуонунан бигэргэтиллибит социальнай көмө тупсан иһэр. Ол эбэтэр гааһы туһаныы оборудованиетын стандартнай кэмпилиэгин ылан биэрэллэр уонна сир учаастагар диэри гаас турбатын уураллар.  Итиэннэ парламентарийдар гаас стандартнай оборудованиетын (оһох, билиитэ, гаас счетчига) сыанатын хонтуруоллууллар.

Олунньу 7 күнүгэр Антонина Григорьева «Газовик» маҕаһыын ситимнэрин дириэктэрэ Александр Козловтуун сыананы аһара үрдэппэккэ тутар туһугар кэпсэтии ыытта. Бу маҕаһыын Саха Сиригэр үлэлээбитэ 15 сылтан таҕыста. Кэмпилиэк сыаната билиитэтэ суох быһа холоон 50-120 000 солкуобайга тиийэр.    

Быйыл кулун тутарга сыана эмиэ үрдүөхтээх. "Ол гынан баран, сыананы маҕаһыыннарбытыгар тута сатыахпыт, барыта оҥорон таһаарааччыттан тутулуктаах. Собуот сыананы иккитэ, саас уонна күһүн үрдэтэр, ол тимир сыаната үрдүүрүттэн тутулуктаах", – диэн дириэктэр чопчулаабыт. Ити маҕаһыын ситимнэрин таһынан, өрөспүүбүлүкэҕэ «Теплогаз», «Газстандарт» курдук онтон да атын ситимнэргэ гаас оборудованиета атыыланар.

Итиэннэ олунньу 8 күнүгэр фракция салайааччыта СӨ монополия утары бэдэрээлинэй сулууспатын управлениетын салайааччыта Юрий Игнатьевтыын оборудованиеҕа сыананы хонтуруоллааһын уонна олоҕо суох үрдээтэҕинэ кинилэргэ сибээскэ тахсыы тула кэпсэттэ.

Юрий Алексеевич этэринэн, бүтэһик кэмҥэ нэһилиэнньэттэн гаастааһыҥҥа үҥсүү киирэ илик. Маҕаһыыннарга гаас оборудованиетын сыаната инфляция түмүгэр 8-9 % үрдээбит.

– Гаас оборудованиетыгар наадыйыы үрдүүр усулуобуйатыгар ырыынак хардатын күүтэбит. Тастан киирбит оһохтор дуоллар кууруһуттан тутулуктаналлар. Гаас электрониката үксүтэ тастан киириилэр. Итиэннэ биһиги СӨ туһанааччы быраабын көмүскүүр уонна дьон соргулаах буолуутун кэтиир бэдэрээлинэй сулууспатын управлениетыгар атыыланар гаас оборудованиетын хаачыстыбатын бэрэбиэркэлииллэригэр көрдөһөр хабааннаах этии киллэриэхпит. Маны тэҥэ куттал суоһаабатын инниттэн, кэмиттэн кэмигэр тиэхиньиичэскэй туругу көрүүнү уонна тиэхиньиичэскэй көрүүнү-истиини ыытар тоҕоостоох, – диэн Антонина Григорьева түмүктээтэ.