Баартыйаларга

Андрей Тарасенко бастаан Бырабыыталыстыба үлэтин сырдатта. Ол курдук, бүддьүөт, тыа хаһаайыстыбатын, чох хостооһун бырамыысыланнаһын туһунан кэпсээтэ. “Зырянкатааҕы разреһы сайыннарар сорук турар. Ол нолуогуттан өрөспүүбүлүкэ хааһынатыгар элбэх дохуот киириэ этэ. Үөһээ Халыма улууһун олохтоохторугар үлэ  миэстэлэрэ да тахсыа этэ”, -- диэтэ.

Премьер-миниистир хотугу улуустарга быйыл таһаҕаһы тиэйии хаһааҥҥытааҕар да тэрээһиннээхтик барбытын бэлиэтээтэ. “Бөртөлүөт оннугар АН-2 сөмөлүөттэри туһанныбыт. Онон элбэх бородуукта, оҕуруот аһа, фрукта тиийдэ. Түһэр сирдэрэ суох буоллаҕына, үөһэттэн быраҕан тиксэрэллэрэ. Усуйаанаҕа уонна Абыйга атыы-логистическай кииннэрэ үлэҕэ киирдилэр. Аны муора пуордун, ньиэп бородууксуйатын харайар тэрилтэ дьиэлэрин тутар былаан баар”.

Базальты оҥорууну сөргүтээри сылдьаллар эбит. Дьокуускайга көтөр фабрикатын кэҥэтэллэр, балык собуотун туталлар. Тимир суолу сайыннарыыга эмиэ элбэх үлэ барар турарын сэһэргээтэ.

Хомуньуус баартыйатын чилиэннэрэ, норуот дьокутааттара Вячеслав Макаров, Евгений Кожухов, Сергей Никонов, Семен Никитин, Роза Солнышкина, Семен Филиппов Бэрэссэдээтэлгэ элбэх ыйытыыны биэрдилэр. Энэргиэтикэни сайыннарыы, ыччат бэлиитикэтин, социальнай эбийиэктэри тутуу, Суол пуондатын үлэтин, дохуоттан нолуогу үрдэтии туһунан ыйыталастылар.

Сергей Никонов Ленскэйдээҕи технологическай техникум 500 устудьуона олорор уопсайа уонна үөрэнэр куорпуһа хаһан тупсарын туоһуласта. “Дьиҥэр, ити кыһаҕа барсыан сөптөөх сэнэх эбийиэктэр бааллар. Атыылаһарбытыгар анаан бу сылга 50 мөл. солк. көрүллүбүт, эһиилги 2022 сылга өрөспүүбүлүкэ инвестиционнай бырагырааматынан 30 мөл. солк. тыырыллыбыт. Ити 80 мөл. солк. харчыга биир да дьиэтэ кэлбэт. Үөрэнэргэ аналлаах эбийиэк иһин 100 мөл. солк. көрдөөбүттэрэ. Оччотугар эбии өссө 20 мөл солк. наада. Экэнэмиичэскэй сайдыы министиэристибэтэ аккаастаабыта, 2024 сылга диэри күүтэрбитигэр эппитэ. Оччотугар өссө 3-4 сыл оҕолор табыгаһа суох усулуобуйаҕа үөрэнэр буоллахтара. Сорохторо бүтэрэн да бараллар. Бу икки эбийиэк Ил Дархан уонна Бырабыыталыстыба испииһэгэр бааллар, туруктара хайдаҕын билэллэр”.

Андрей Тарасенко бу курдук хардарда: “Эһиилги бүддьүөккэ үөрэнэр куорпус дьиэтин атыылаһарга үп көрүллүөхтээх. Олорор уопсайга барсар эбийиэги Ленскэйгэ булбуппут. Ону техникумҥа биэрэр гына кэпсэтэ сылдьабыт. Эһиил бүддьүөккэ харчы көрөн, өрөмүөнүн ыытыахпыт”, -- диэн. Онуоха Сергей Никонов хап-сабар: “Ээ, ол дьиэ дьаабы, оҕолор олороллоругар сөбө суох. Ону ылбаппыт”, -- диэтэ.

Семен Никитин тыа сиригэр олорор бүддьүөт үлэһиттэригэр дьиэ-уот тутуута хайдах балаһыанньалааҕын токкоолосто. “Өрүс турар кэмигэр илин эҥээр балыыһаларыгар кислороднай баллоннары хайдах тиэрдэҕит? Дьокуускайга ковидтаабыт киһи ахсаана күн-түн элбии турар, онон өссө биир обсерваторы тэрийэргит буоллар”, -- диэтэ.

Парламентарий ыйытыытыгар Андрей Тарасенко: “Бырабыыталыстыба тыа сиригэр социальнай эбийиэктэри бырайыактыыр биэдэмистибэннэй, ону таһынан ол дьиэлэри тутар анал тутуу хампаанньатын тэрийэр былааннаах”. Иккис ыйытыыга  кислороду оҥорон таһаарар собуот үлэтин туһунан кэпсээтэ.

Виктор Губарев премьер-миниистир Андрея Тарасенко, быыс булан, баартыйатын чилиэннэрин кытта көрсүбүтүгэр махтанна.